حكاوي ..5

مستني إيه منها غير الفتافيت ...

عمركش شفت حداية .. بترمي في الكتاكيت

 ..دي صحبتك عن قلبها ..ياما قالوا حواديت

 ..قادرة وياما ..خوفت عفاريت 

تقتلك .. وفي ميتمك ترقع بالصويت 

متستقلش بيها ..اوعى تبقى عبيط ..

هي الحريقة عايزة إيه ..

غير بس عود كبريت ..

*-*-*-*-*-*-*-*-*-*-*-*-*-*

فاتت سنين 

كنت نسيت فيها الحنين  ..

وقلت لو عدت قصادي ..

ولا عليا رجعت تنادي ..

مش هعرفها  ..خلاص نستني السنين ..

وفي يوم .. لاقتها جاية ..

مستحملتش عينيا ..

أغمى عليا ..

يمكن سنين ..

و لما فقت .. عليها سقت ..

سيدنا النبي ..

و الست عايشة و الحسين ..

لاتخف عينيها شوية عني  ..

عقلي خلاص هيشت مني ..

و قلبي فرفر م الحنين  ..

قال إيه .. نستني السنين  ..

*-*-*-*-*-*-*-*-*-*-*-*-*-*-*

ماعرفش ليه أنا لما اشوفك .. باطير .. و أحلق ..

و فيكي أسرح .. و عقلي يجري ..و مين اللي يلحق ..

هي المرايا برضه معايا .. فيكي بتحقق ..

النظر ليكي مش كفاية .. تسمحيلي أبحلق ..؟!!

فكرة 1

تفتق ذهني المتواضع عن فكرة أن نحلل الحوارات الصوتية لبعض السادة الأفاضل قادة الثورة ك فتحي سرور و زكريا عزمي و غيرهم إلي إتضح انهم كلهم كانو ضد مبارك ، لمعرفة مدى الصدق من الكذب ، و بما إن عرضهم على أجهزة كشف الكذب متعذر لأنهم سادة أفضل أولاً و لعدم جدواه ثانياً ، لجأت إلى صديق أستاذ في علم الصوتيات و التعرف على الأنماط ، و قال هنحتاج قاعدة بيانات صوتية للمذكورين ، قلت و ماله ، قالي هتكتب كود لتقطيع الحوارات ، قلتله ماشي ، قالي لازم عشان ندرب النظام تجيب مقاطع صوتية أكون متأكد انهم صادقين فيها ... لحد هنا و معرفتش أقوله إيه ....

كرامة الرئيس المصرى

 منقول بغير تصرف

الذى لا يمكن أن يتحمل المرء سماعه ، ولا يطيق استماعه ،وينفجر غاضباً ، صارخاً ، هادراً ، فيمن يقوله ، ألا وهو ذلك الحديث

الممجوج التافه ، الذى يصيب المرء بخليط من مشاعر الغضب ، والغثيان ، عن الطريقة الكريمة التى ينبغى أن يخرج بها ذلك الرئيس من مصر ، وأنه من الأصول والأدب ، والأخلاق ، والكرم ، والمروءة ، بعدما قال الرجل ما قاله ، من أنه يريد أن يموت على أرض هذا الوطن ، إذن فمن الواجب – من وجهة نظرهم- أن نعامله بشكل كريم ، وأن نعطيه الفرصة ليختم حياته بالشكل اللائق ، ويضرب أصحاب هذا القول القبيح ، المثل بوالد خدم أبناءه وأسرته ، أو برئيس شركة فى ختام فترة خدمته !! ووالله إن المرء يكاد يلفظ ما فى جوفه من شدة القرف من هذه الأقوال الرديئة التى تعبر عن عقل مُغيب ، وفهم سقيم ، وخفة مهينة .

أى خدمات قدمها لهذا الوطن غير الفشل الكلوى ، والوباء الكبدى ، والطعام الفاسد ، والهواء الملوث ، والاقتصاد المنهار ، والتفكك الأسرى ، وصفر المونديال ، وانهيار التعليم ، ونزيف الطرق ، والبطالة ، والتضخم ، وانهيار الجنيه وخراب لا أول له ، ولا آخر

أردوغان استلم تركيا وهى فى الحضيض ، فاستطاع فى ثمانية أعوام أن يجعلها خامس اقتصاد فى العالم ، وأن يحقق شروط الانضمام إلى الإتحاد الأوربى ، وأن يحولها إلى دولة محترمة فاعلة مؤثرة ،

مهاتير محمد ، استلم ماليزيا ، دولة لا يسمع عنها أحد ، فجعلها نمراً آسيوياً واعداً

الرئيس البرازيلى استلم دولته - لحم على عضم - فجعلها فى فترتين رئاسيتين من أقوى عشرة اقتصاديات فى العالم ، الصين وكوريا فضلاً عن اليابان وألمانيا ، خلف هذه المعجزات رجل عاش لأجل وطنه وناسه فحقق المعجزة ، فأمثال هؤلاء يستحقون التكريم ،

حكاوي ..3

في مهب الريح رفرف علم ..

نطق وقال عايز قلم ..

عايز أغير لون خطوطي ..

لونها بيهدد بموتي ..

و مايغركوش اني برفرف ..

أنا بافرفر م الألم ..

حكاوي ..2

يوم ورا يوم بيجري .. و سنين تفوت ..

و ناس بتدور في ساقية ..و تحت الرحى بتفوت ..

و ناس بتضحك عليهم .. و على رقابهم تفوت ..

هي كدة الدنيا ..

ناس بتموت علشان تعيش ..

و ناس بتعيش علشان تموت ..

حكاوي ..1

أحلف بسماها و بترابها ..

أحلف بالحزب إلي خربها ..

أحلف بالأمن المستنطع ..

و بوقت حياتي المستقطع ..

بالناس إلي ماهيش في الدنيا ..

ماتشوفوا لا نور ولا حرية ..

و انتم راضيين بالعبودية ..

*-*-*-*-*-*-*-*-*-*-*-*-*-*-*

ماتحاسبونيش ..

لو حبيت بعد فراقها بـ مفيش ..

الطوف

بمرور الوقت ..

بيمشي الطوف ..

في بحر الدنيا .. و ينسى الخوف 

و يطوله في وقت الهجر المد .. 

و دموعه تفيض ..

 و يشده في وقت القرب الجزر ..

و شموعه تقيد ..

و تهده .. أعاصير و هموم 

و يقوم يجري يجمع نفسه ..

أخشابه أمل ..

و حباله حياه ..

و شراعه هوى ..

و الدفة .. مصير 

بمرور الوقت بيمشي الطوف ..

و ساعات في الضلمة ..

يفتكر الخوف ..

و مايعرفشي على فين رايح ..

و المد دموع ..

و الجزر شموع ..

و تزيد في عيونه الاعاصير ..

و يقوم خايف .. يلملم نفسه .. 

أخشابه أمل ..

و حباله حياه ..

و شراعه هوى 

 بمرور الوقت بيمشي الطوف ..

و كتير في العتمة .. يهزه الخوف 

و مايعرفشي مع  مين  رايح ..

و المد دموع ..

و الجزر بعيد 

و بقى بيخلف في المواعيد ..

و تعدي الاعاصير من جنبه ..

يتبعتر ..

من كل جوانبه ..

و بإيدين ..  مربوطة ساعات ..

و كسلانة ساعات ..

يشد في نفسه ..

أخشابه أمل ..

و حباله حياه ..

 بمرور الوقت بيمشي الطوف ..

و بينسى الدنيا ..

و ينسى الخوف ..

و يفتكره الخوف ..

و المد دموع ..

و الجزر دموع ..

و الاعاصير ..

بتعلم فيه ولادها ..

و مايدورش ..

يا دوب بيحسس على نفسه ..

حباله حياه ..