حكاوي ..3

في مهب الريح رفرف علم ..

نطق وقال عايز قلم ..

عايز أغير لون خطوطي ..

لونها بيهدد بموتي ..

و مايغركوش اني برفرف ..

أنا بافرفر م الألم ..

*-*-*-*-*-*-*-*-*-*-*-*-*-*-*

شفت طير شايل حجر ..

نقى غصن من الشجر ..

و حطه عليه ..

هبت رياح .. وقع الحجر ..

نزل تاني جاب الحجر..

و على نفس الغصن من الشجر ..

حطه عليه .. هبت رياح .. وقع الحجر ..

و فضل يشيل في الحجر ..

و ترميه الرياح من عالشجر ..

لحد مامات ..

و حطوا على قبره الحجر ..

مكتوب عليه ..

مات .. و دماغه أنشف م الحجر ..

*-*-*-*-*-*-*-*-*-*-*-*-*-*-*

نفس الدمعة .. نفس الحرقة ..

نفس المرارة اللي في دمه ..

و لازم تواسي عمرو و زيد ..

كله في همه ..

واحد عشان ماتت أمه ..

وواحد عشان إتعاص كمه ..

هي كدة الدنيا ..

كل واحد على قد همه ..

أحمد عبدالسلام . يونيو 98