حكاوي ..2

يوم ورا يوم بيجري .. و سنين تفوت ..

و ناس بتدور في ساقية ..و تحت الرحى بتفوت ..

و ناس بتضحك عليهم .. و على رقابهم تفوت ..

هي كدة الدنيا ..

ناس بتموت علشان تعيش ..

و ناس بتعيش علشان تموت ..

*-*-*-*-*-*-*-*-*-*-*-*-*-*-*

كنت أنا و الطريق و عمري في سباق بنجري ..

 تعب الطريق .. و فضلت أنا و عمري نجري ..

بعدها .. تعبت أنا ..و فضل عمري يجري ..

بنده عليه .. قال عايز إيه ..

مش وقفت ..!!!

يبقى خلاص .. مت من بدري ..

*-*-*-*-*-*-*-*-*-*-*-*-*-*-*

قفلت قلبي من بعدها .. و قلت كفاية كدة لاحسن أموت ..

و قفلت عقلي بعد اللي شفته .. لأتقهر .. و اطق أموت ..

و قفلت بابي عن أي حد .. المرة الجاية فيها موت ..

ببص في المراية قالت تمام ..

قفلت علينا أجدع تابوت ..

*-*-*-*-*-*-*-*-*-*-*-*-*-*-*

عباس غلط في مرة و اشتكوه ..

القاضي قال ..هاتو عباس و اضربوه ..

ياكوف قتل قتيل .. و اشتكوه ..

القاضي قال ..هاتو عباس و اضربوه .

القاضي كترت فضايحه .. و اشتكوه ..

رد هو .. هاتو عباس و اضربوه ..

عباس ورم .. صرخ ياعالم ..

اشمعنى أنا اللي بتضربوه ..

القاضي قال ماتزعلش نفسك ..

اللي نعرفه .. أحسن م اللي مانعرفوه ..

خدوا عباس ..

و اضربوه ..

أحمد عبدالسلام .. أوائل 1998