غزل بنات

مش عايز تاني غزل بنات..
مادام بالدمع متسكر..
والوانه ماهيش فرحه..
دي أهات طارحه..
وامنيات..
تايهه.. في حلم متعكر..
تغور الطرحه..  والشربات..
وزغاريد الفرح ليله..
لو العمر اتقلب شيله..
كلامه سكات..
مش عايز تاني غزل بنات..

المرض

دورت كتير على الغلط ..

وقلت بالكتير هيكون ..

طريقه أو طبع انفرض ..

لكن المرض مكانش طبع ..

كانت العقول هي المرض ..

كانت العقول جواها ناخر السوس ..

حافر حفر جواها المرض مدسوس ..

شاري ومستشري وداخل جوه النفوس ..

خلى العقول على أهلها بتدوس ..

كانه طوفان .. 

غمى البصيره قبل البصر ..

وعليهم فرد ..

بقت العقول بتفكر ازاي تعذب نفسها ..

ازاي تلاقي طوفان يغمر حياتها .. يهدها ..

ازاي تكسر جسور الود .. بينها وبين من حبها ..

ازاي تخلي أفكار مريضه .. تملك مصيرها ..تشدها ..

لمرض عسير ماله دوا .. لو على مليون طبيب يتعرض ..

كانت العقول أكبر مرض ..

 Ahmed A. Mostafa 1995

طز فش

آه يا أحفاد الفراعنه..
طز فش وألف لعنه..
في اللي قش
واللي رش..
واللي غش..
واللي خاننا واللي باعنا..
طز فش وألف لعنه..

في اللي قسمنا بكتاب.. 
واللي قسمنا بحديث..
واللي قسمنا بقلم.. 
واللي قسمنا بعلم..
واللي قسمنا برئيس..

واللي قسمنا برصاصه..
واللي شافنا نموت ولكن..
دارى عينه ولف راسه..
واللي شاف الظلم بين..
وقال يغور ماهو مش تبعنا..
طز فش وألف لعنه..

ليه طفيتو بدمع ناس..
شمع عشانكم يوم قادوه..
ليه رضيتوا..
وليه طاطيتوا..
والشرف قلتم خدوه..
العدو بقى حضنه جنه..
ومن أخوكم بتعادوه..
جتكوا نيله بكل معنى..
طز فش وألف لعنه..

مايصحش

الورد جه يفتح..
قالوله مايصحش..
والشمس جت تشرق ..
قالولها ماتشقش..
خدوا الغطا في الشتا..
وسحبوا النسيم في الصيف..
وقبل اما ييجي خريف..
خدوا الورق م الشجر..
وقالوله ماتكحش..

لأ …ستة

كل عام وسط السكوت  ..

نفتكر نفتح تابوت …

دفنا فيه لحظة حياة ..

ورجعنا تاني عشنا موت …

****--------******-------*****

قلنا السلام ..

جت الضباع لابسة  حمام ..

ونخورت جوه القلوب ..

مسك الزمام  ...

كل حد ماهوش تمام ..

وبابتسام  ..

وبمنتهى الانسجام ..

بقى احتلالنا منا فينا ..

سد المسام ..

بقى كل شيء بندوقه سام ..

بعد ماعبرنا القناه ..

كافئنا كل من عبر ..

بنيشان جعان ..

ونوط من عدم الإحترام ..

غرقوا ولادهم ..

في عبارات ابن اسماعين ..

ماهو واد متين ..

مفيش كلام ..

بعد ماصادوالدبابات ..

اصطادومنهم ..حتى النفس والأمنيات ..

وقالوا على النصر السلام ..

 ****--------******-------*****

الحلوة دي قامت تعجن في المصرية  ..

وحلفت تطلع عين ابوكوا الأسطى عطية ..

واللي مايدعي لقائد الطلعة .. روحه دي طالعة ..

وحصته في البيت هتروح لكبير الحرامية  ..

****--------******-------*****

كانت آخر فرحة  يابلدي  ..

بعدها مافرحتيش غير يمكن ..

بنتيجة ماتش في جورنان ..

كام ستة أكتوبر عدو ..

ولا جه سادس الخلفا ..

ولا فجرك بان ..

والمصري دايما في سرادق ..

مستشفى ..مدرسة ..دكان ..

كلية .. شركة .. بستان  ..

واقف ياخد في عزاكي ..

ميت .. متسند على عيان  ..

مستني حد ياخد يده ..

مع إن الحل أهو في يده ..

لكن خايف يرفع يده ..

لايهده .. صوت السجان  ..

حتى النسر مابين الاسود والاحمر ..

مستغرب ليه مربوطة جناحاته ..

وعايز يهرب لعلم تاني ..

من غير الوان …

****--------******-------*****

عنوان القصيدة( ان اطلقنا عليها ذلك)  مقتبس من مقطع من مسرحية “ سك على بناتك “ لفؤاد المهندس

//المهم أن الأستاذ المسن الذي تصلبت شرايين مخه، والذي عاش عصور النفاق منذ أيام مولانا ولي النعم، اعتلى المنبر فقال بالحرف الواحد: "الله يقول: إن في خلق السموات والأرض واختلاف الليل والنهار لآيات لأولي الألباب .. أما نحن فنقول: إن في خلق السادات والأرض .. كذا .."

//ماشئت لا ماشاءت الاقدار....فاحكم فأنت الواحد القهار
وكأنما أنت النبي محمد .....وكأنما أنصارك الانصار !!
بصرف النظر عما في هذا الكلام – البيت الأول - من شرك صريح، فإن أية أمة يُقال فيها كلام كهذا هي أمة مقضي عليها بالفناء.

//إقدام عمرو في سماحة حاتم .....في حلم أحنف في ذكاء اياس
هنا يتدخل رجل بلغت به (سلطنة) النفاق درجة أعلى .. هذا الرجل هو أبو يوسف يعقوب الكندي قائلاً: ـ"الأمير فوق من ذكرت !"

//أحيانًا يبلغ النفاق درجات من التعقيد يصعب أن تتخيلها .. مثل ذلك المطرب الذي ينشد في أحد أعياد أكتوبر: "لا حيغنيني ولا يرقيني .. ولا فيه مصلحة بينه وبيني .. باقولها وأجري على الله .. علشان كده احنا اخترناه !" .. يريد أن يقنعني أن مدحه لرئيس الجمهورية هو كلمة حق أمام سلطان جائر ! .. وأجره بعد ذلك على الله ..

//من مقال الدكتور أحمد خالد توفيق "الأمير فوق من ذكرت "

هي هي

الوساخة  هي هي ..
مهما حبكو  التمثيلية ..
مهما قالوا و مهما عادوا ..
من كرامته من زناده ..
عاللي منه ..
مش اللي عادوا..
مستحيل  تكسب وداده  ..
إلا برضاك  الدنيه ..

صحيت

صحيت ..     

من يوم ميلادى بالتمام 

ولسانى محتار فى الكلام 

خايف لاينطق ..

يغلط يلخبط فى الكلام 

خايف لا ينده.. 

مايلاقيش اي اهتمام.. 

واخرتها..

فوض القلم..

يوصف مشاعرة..

كانت فرح ..

كانت الم.. 

خلى الورق ..

كل الوجود..كل العدم 

خلى ضحكى.. 

ويادمعى يترسم..

وقال ..وقال ..وقال

كل الكلام اللى اتردم.. 

لحد ما وصلت لكلام.. 

محتاج لصوت ..

محتاج صراخ.. 

مش  سكوت

محتاج حياة ..

ابدا.. مش محتاج لموت 

وحاول لسانى لكن فشل 

ومات على قلمى الكلام

ودخلت انام..

العمر

بيمضي العمر..
وبتعدي علينا ساعات..
نحس التوهه واخدانا..
نحس زمانا كسرنا..  وقسانا..
نحس القطر عدى..  وفات..

بتجني الوحده أزهارنا..
وبتغير في جوانا..  ومظهرنا
عشان زرع المحبه بار..
في ارض عصيه عصيانه..
بتشرب..  تصحى نسيانه..
سقاها مين..
وتتذكر عطش مره..
وتسلى غمر عمره سنين..
ويوم ورا يوم..
بيعدي الهوا سهوه..
وتخشى قلوبنا تجري وراه..
لاتستهوى..
وتتكسر فيها الزهوه..
بمكانها فين..
ويمضي العمر..
ويبقى ساعات..
لافيها راحه ولا روحه..
ولاجايات..
خلاص القطر عدى وفات..

وجهة نظر

ليه فاكر وجهه نظرك..  هي بس اللي صحيحه..
لو تلبس جزمة غيرك.. كله هيقلب في عينيك..
فكر في دوافع غيرك.. مثلا في ازازه الريحه..
انت بتتعطر بيها..  وهي بتتف عليك.. 😁

ناس

بتعرف ناس
بتحتاجلك..
فتندهلك..
وتشتاقلك..
فتفرحلك وتحزنلك..
فترسم نفسها أهلك..
لحد مايوم..
ماتحتاجلكش..

وتعرف ناس
تكون أهلك..
فتفرحلك و تحزنلك
وتشتاقلك
فتندهلك..
لحد مايوم ماتحتاجلك
فمتقابلكش..

وتعرف ناس
ماهياش ناس..
لاهي بتحس.. ولا بتحتاس..
بتاخد حظها منك..
وترمي شكرها بمداس
لحد مايوم..
(أكيد في يوم).. ماتظهرلكش..

ومهما عرفت..
فماعرفتش..
لأن الناس ماهيش انت..
وساعات انت ..
ماتشبهلكش..

رمضان

يارب جه رمضان..  وقلوبنا ماجاياشي..
سبنا أكل وشرب..  والباقي ماسبناشي
لو الشيطان متكتف.. ذنوبنا ليه بتتستف..
يارب غيتنا..  عملنا اهه..  ماغتناشي..

رسالة

الى من يحاولون محاربة القدر ..

الى من يستلذون دماء البشر ..

الى   من    يسبحون في بحر الدماء ..

الى من يكرهون سحب السماء

لأنها ..

على غيرهم أسقطت المطر

الى من سمموا مياه البحور ..

و بعد البشر يأكلون الزهور ..

و يفزعون إذا هم طفل بـرمى حجر ..

الى من يفاوضون باسم السلام

و ترك السلاح و حفظ النظام

و عن بغيكم يغضون البصر ..

تذكروا ..

أن من يرعونكم ..

كانوا ..

و بكم مازالوا رعاة بقر

و تذكروا .. ان من جعل لكم مكانا تحت الشمس ..

جعل لكم مكانا فى نار ألف شمس ..

مكانا  .. في ســـقر

ما يحكمشي

إحنا اللي دهنا الهوا أحكام ..
و بعنا بكام ؟ ..
ما قوللكشي  ..
إرجع ياعم اتغطى ونام  ..
ماهي الأحلام ..
في غير النوم ..
ما بتجوزشي ..
و صوتك واطي عن صوتك .. ب ألفين عام  ..
و قفاك قدام ..
ف شئ زيك .. ما يحكمشي ..
    ما يحكمشي ..

أرض الغلابة

أرض الغلابة .. أرض العجايب

فيها لاانت حاضر و لا انت غايب

فيها ياخدوا  قمحك و يمحوا ملامحك

يهينوك و تدعى سيدك يسامحك

م الغلب تلقى .. شبابها شايب

حاضر يا سيدى .. أمرك يا سيدنا

ماانت ابن تسعة و هو ابن سته

تديله عمرك حته حته

و تفضل  يا غلبى العمر و انت

م السيد ده هايب و السيد ده هايب

   يا أرض الغلابه .. نصيبك نسيبك

بنجرى و نهرب .. من ظلم سيدك

ضحكت و قالت .. روح لو هتقدر

فى البحر تزرع و تحصد يا  خايب

                          دى أرض الغلابة.. أرض  العجايب

7/95