نفس الملامح

نفس الملامح عليك آه ياوش ..
نفس الخطوط .. ماتغيرتش ..
كإن السنين .. ماتحركتش ..
وسايباك ولكن ..
وشوشنا ماسابتش ..

ده حتى ابتسامتك.. ماتعكرتش ..
وسألتك شفايفك ماتكلمتش ..
وردت عيونك ماترددتش ..
قالتلي الملامح يمكن تغش ..
لو القلب شايب ..
ملامحه ماشابتش ..
ماتعرفش سني يمكن عشان ..
عيونك شافتني ..
وروحك ماشافتش ..
على عقلي يمكن .. ماتعرفتش ..
أنا عمر قلبي غريب.. ماتحاولش ..
تعده بسنين فاتت أو مافاتتش ..
أنا يوم فرحي محسوب ولكن ..
سنين حزني أبداً ..
ماتتحسبش ..
ويومي معاها بسنين ولكن ..
ماتحسبش ثانيه .. ليها عيني ماشافتش ..
إنسى الملامح .. وانسى الوشوش ..
ده قلبي اللي عاش ..
ملامحي ماعاشتش