دق الوتد

دق الوتد ..
و انصب خيام مالهاش عدد
ما تسيبش ارضك مهما كان
قلبك فى ارضك اتوجد
و مهما طال بك الزمان ..
اصمد زى ما غيرك صمد


و لو صهيون ..
ازداد جنون
و مسك فى ايده خريطة الكون ..
و على ارضك نوى و عند


اقف متين زى الشجر
افرد جذور و اطرح ثمر
و لو قدر و بغى و غــدر ..
رقبتك .. قبلها تتحصد


و مهما الشيطان كان له حليف
و نهب أرضك بطلان و زيف
و سرق قوتك حتى الرغيف
ليك رب برضه اسمه الصمد


و مهما بنى بحديد و طوب
خليك فى ارضك .. ازرع قلوب ..
فى ترابها اتعفر و دوب
و مسـيــــر بنــاه يصبح هـــدد
و دق الوتد .. ..