الكادر

اضبطلي الكادر على الدمعه ..

ركز على عيني ..

طلعني وحيده ..

والناس لألامي ماهيش سامعه ..

لأ شيل المشهد التاني ..

انا كنت بازعق حياني ..

كده زعله هيطلع في الصوره ..

خلي بدايه الحدوته دايما

وانا مظلومه وتايهه ومقهوره ..

لأ مايهمش ..ترتيب أحداث ..

مايهمش مين غلط الأول ..

ولا مين انداس ..

قرب بالعدسه على جفوني ..

خلي سوادهم هو الدنيا ..

واعمل زووم ان ..

عاللي جافوني ..

انا عايزه كل ردود فعله ..

تبقى الأفعال ..

صغر افعالي .. امحيها ..

خليها حلال ..

هنقص من القصه شويه ..

دي حكايتي وانا حره احكيها ..

انشالله اخلي النار ميه..

ايوه والمشهد ده .. ده كمان الغيه ..

انا باضحك فيه ..

مبسوطه وهو سبب فرحي ..

انا عايزه بس يبان جرحي ..

افهم ياسفيه ..

مايهمش هنشيل كام مشهد ..

كلها كادرات ..

خليلي بس اللي هايشهد ..

اني اتحملت دموع وآهات ..

خلصنا خلاص ؟؟!!

اعرضلي النسخه النهائيه ..

اممم .. والله القصه جميله ياناس ..

امسحلى الباقي من الميموري

ماعرفش ازاي ..

اتصرف اومال مخ ازاي..

واكتب عالنسخه كتاب عمري ..

اصل ومش عايز اثبات ..

احمد عبدالسلام

مارس 2018

احلام..

يوم السفر..
والدي قاللي..
قول يارب..
تقلت حمولك..
وياه بيتخفوا..
وحرص لنفسك..
أماره هي..
وشياطينها بيتخفوا..
وامي قالتلي تقل هدومك..
اي حاجتين فوق بعض..
بيدفوا..
وبرد المشاعر..
شوفله ونيس..
ياخدك على كفه..
دي الغربه والوحده..
جناحات لدور.. ياما..
دمع العينين صفوا..
وادي السنين دارت..
والمركبه اختارت..
100 شط تفارقهم..
وكل احلامي..
من عقلي لخالقهم..
في الصمت يتزفوا..
انجزت ياما كتير..
احلام كتير غيري..
وحلمي اللي ماسكنتوش..
بادفع ايجاره رتوش..
على رسمه لمصيري..
ممضيه " أنا مسيري"
اتغطى انا بحلمين..
فوق بعض..
بيدفوا..

احمد عبدالسلام
مارس 2018

اللحظه..

جواك بركان..
خايف لايثور..
يحرق نفسه..
حيران مع بكره..
ومع امسه..
والحاضر تاه وسط التفكير..
والفكر اهه طال..
افرح ياحزين..
الحزن قصص مافيهاش ابطال..
والحيره لعوب مشيها بطال..
اللحظه هدومها بتتقطع..
بين اللي هيجرى..
وكان يامكان..

جواك عصافير..
وجيوش صفافير..
عايزه تغني وتطير لكن..
محبوسه في عينك ورا نوافير..
دمع من الغالي المتكلف..
اقعد شنف..
ذكرى ورا ذكرى يامتخلف..
عن كل ماهو بيدور الآن..
خليك قلقان..
لا اللحظه الحلوه بسرعه تفوت..
والفرحه تموت..
واديها معاك فاتها ميلادها..
افضل عيدها..
جوه خيالك اهي واقفه طابور..
وعمدان النور اللي في قلبك..
بتنور بس في وقت النور..
والظلمه معاد ومالوهشي في دور..
وانت طموحك..
تقعد تتخبى في ليل روحك..
والليل اوضه مالهاش اركان..
زي البركان..

مايهمش

وبتعدي..
وبتطنش..
وبتنادي..
ومايردش..
وبتحاول..
فتتزاول..
وتبني ماتجني وتقرب..
فتدشدش..
يامتغرب..
قصاد نفسك..
ومتجرب..
قصاد الناس..
حنيت راسك قصاد الفاس..
ولاحنش..
وجافاك لفكر متحنش..
غريب دارك..
ومقدارك..
كبير لكن..
رضيت قدامه تتهمش..
فمايهمش..

حوار.. مع حد احسن بكتير

قاللي..
انا أحسن منك بكتير..
ولا باحتار وسط الأفكار..
ولا باتوه وسط المشاوير..
ولا باتغرب في عيون ناسي..
ولا حد بيجرح احساسي..
ومادام واقف على رجليا..
بارفع راسي وسط الأعاصير..

مبفكرش مين فرحني..
ومين جرحني..
ولا مين خلاني ابات محني..
على ايه التفكير..

على ايه راح أفكر في ردود..
واتحمل خناقات وبرود..
واللي بينسى ان انا موجود..
وبينسوا كتير..

بتقول دايما ان كلامك..
مش لاقي ودان عليها يرسي..
وبيفتكروك وقت ألامهم..
ووقت ألامك دايما منسي..
وتقول زيك زي الكرسي..
وماله الكرسي..
أحسن بكتير..

بالذوق

اخرج بالذوق ..
كام ليله سواد ..
بعدين هتروق ..
النفق الضلمه ..أخرته مش نور
ولايوم كان ليك ..
انظر حواليك ..
في كتير عالغصن ..
في لقاهم لهفه ..و في روحهم حسن ..
ويستاهلوا الشوق ..
اخرج بالذوق ..

اخرج ياعبيط..
العاقل مابيمشيش عالحيط..
ودي مش فارقه..
عقلها برضه مسروق خلقه..
على ايه التنطيط..
ماهو نفس الفرق.. مع فرق النفس..
وفي الأخر طيط..
خليك في الحله ومتغطي..
وافضل وطي..
قبل ماتغرف مش كنت تدوق..
يا اما ياصاحبي..
اخرج بالذوق..

أحمد عبد السلام
ابريل 2018

كنت هناك

من قبل ماييجي دول أو دول ..
انا كنت هناك ..
سارح في مابينك ومابينك ..
زي البندول ..
يتعوج الدرب لأحلامك ..
افضل معدول..
والخط السارح من فكرك ..
دايما موصول ..
من غير اسلاك ..
مانا كنت هناك ..

من قبل العسكر والدراويش..
انا كنت فاتحلك 100 شباك ..
حنيت علشانك ضي الشمس ..
لايروح مايجيش..
ورجيت القمره تعدي بهمس
من بين الشيش  ..
ولما ناديتي  ..!!
جبتي الخفافيش ..!!
وقلتيلي في الأخر ايه وداك ..
من أخر الدنيا لحد هناك ..

من قبل مايعلى في قلبي الشوق ..
لفيت حواليكي كل الأفلاك ..
ورسمت سلالم عاليه أوي ..
ورفعتك فوق ..
وناديتك ياما ..
ومن بعد سكات ..
رميتيلي الطوق ..
وكسرتي رقبتي ب 100 شده ..
ورغم الهده ..
كنت معاكي في وقت الشده ..
ومازلت هناك ..