إنحدار

تعرف ازاي انك بتواجه جهل وإنحدار إنساني وعلمي وعقلي  .. لما تلاقي المواقف دي 

لما تلعن ناس عشان لسانهم وسخ أو وحدة إتصورت صورة مش عاجباك و تمجد في ناس قتلو (أو مسئولين عن قتل ) الألاف .

و برضه لما تلاقي ناس مبتعرفش تقول رأيها غير لما تقول كلام وسخ 

لما قلبك يطاوعك انك تستغل وجود بعض البلطجية لتعمم أن كل الثوار بلطجية ، حتى أمهات قلبهم انفطر على ولادهم. 

و برضه لما تستغل أمهات قلبها مفطور على ولادها في لحظات هم أضعف مايكونو فيها .

لما تصر إن من حق الشرطة تقتل الناس بحجة الدفاع عن معاقل الداخلية .. طب هما لو ضربوهم في رجلهم هيهجمو برضه .. دة بفرض انهم لسه بيهجمو ..

و برضه لما تلاقي ناس بتشجع شباب في عمر الورد أن يموت بلا طائل 

لما تقعد تشتم في كاتب أو شخصية و تقول عليه خاين و عميل و لما يقول إلي على مزاجك تستشهد بكلامه و تنشره . 

أو لما تمجد في كاتب أو  شخصية و لما ميعملش إلي على مزاجك يبقى خاين و عميل .

لما تلاقي تأليه الشخصيات يوصل لأن الناس تفتكر إن المجلس العسكري هو الجيش و إن المجلس العسكري لو راح هتبقى البلد راحت .

و برضه لما تلاقي ناس فكرة إنه بمجرد رحيل المجلس العسكري الحياه لونها هيبقى بمبي.

لما تلاقي ناس عمرها ما اشتغلت بتقلك أنا نازل الشغل يوم الإضراب عشان البلد ما تقفش. 

 و لما تلاقي ناس بتدعو لإضراب عام بدون تنظيم بما يضرهم هما مش إلي عايزيين يوصللهم الإضراب .

لما تصدق إن أي شخص هيكون صالح و محصلش مدام بقول قال الله وقال الرسول (حتى لو طلع الكلام ملوش علاقة بما قاله الله أو الرسول  )

و لما ترفض تصدق أي حد لمجرد إنه بيتكلم بإسم الدين .

حكم عقلك  مفيش حد صح على طول .. و مفيش حد غلط على طول ، و مش معنى إن حد مش ماشي في سكتك يبقى خاين و عميل و مش معنى إن حد ماشي معك إنه عايز مصلحتك ، و مش معنى إنه غير من هنا لهنا إنه إرتد عن دينك 

أحمد عبدالسلام مصطفى 

11.02.2012

شرب القهوة

شرب القهوة  ..

كانت مرة  ..

أصله محطش فيها السكر ..

مع إن السكر قدامه  ..

لكن مش عارفه .. أصل الامه ..

خلته ينسى حتى كلامه  ..

بس شربها ..

ماهو ياما  حلول إستقربها ..

علشان أريح ..

مش ناوي يتعب ويفكر  ..

فات قدامه ..

واحد المفروض خدامه  ..

بس كلامه ..

و كانه  سيد أيامه ..

حطله معلقتين في القهوة ..

قاله دة سكر ..

صبحت مرة يمكن أكتر ..

وفضل يشربها ..

مهما المر دماغه حاربها ..

كان متعود ..

راضي بالمر كانه مقدر ..

فات قدامه  ..

واحد كان النور في سلامه ..

حلو كلامه ..

بس  غريب ..

بيقول نتحرك و نفكر ..

حطله معلقتين في القهوة 

قاله دة سكر ..

صبحت أحلى ..

و استغربها ..

و قعد متردد يشربها ..

لعن الواد و لعن أيامه ..

ماهو معرفشي طعم السكر ..

لما تفكر ..

شيل الملح ..حط السكر ..

يسقط ..يسقط ..حكم العسكر ..

أحمد عبدالسلام مصطفى 

31.01.2012   

Quotes and Wisdom

Maybe this world is another planet's HELL

Aldous Huxley

في شعب

في شعب يريد يخلص م الجور ..

وفلول الزور ..

ويقيم بلده .. بهلال وصليب ..ويعيش مستور ..

ويقول رأيه .. ولا يصبح مقهور أو محظور ..

في شعب يريد يفضل يحلم ..

من غير ما يخاف ..

يغتالوا الحلم في عز النور ..

و في شعب يريد .. نملة بطرطور ..

ولبن العصفور ..

وسبع هداهيد بيغنوا تينور ..

وحمامة يتيمة جدها كان تور ..

في شعب يا ناس عايز يحلم ..

من غير ماينام..

لكنه مصر يطفي النور ..

وفي شعب على الاتنين بيجور ..

ويعلي السور ..

ويفصل على قده الدستور ..

حرامي و قاتل .. بلطجي مسعور ..

في شعب يريد يطلع في الحلم ..

ويخليه كابوس ..

ويكب العتمة في طبق  النور ..

الشعب يريد .. والله يريد ..

إحمينا يارب من المطاريد ..

و متحرمناش أبداً م النور ..

حكاوي 4

لحد دلوقتي .. ومن قبل حتشبسوت وتوت ..

محدش بيتعلم .. مهما العبر عليه تفوت ..

لسة الفراش بينط في النار .. طالب النور .. وبيموت ..!!

لسة السمك بيلقط الطعم .. وياخده الشبك .. ويموت ..!!

و فرس النبي بيجري لحبيبته .. وتفرح بخيبته .. ويموت ..!!

حكاوي ..5

مستني إيه منها غير الفتافيت ...

عمركش شفت حداية .. بترمي في الكتاكيت

 ..دي صحبتك عن قلبها ..ياما قالوا حواديت

 ..قادرة وياما ..خوفت عفاريت 

تقتلك .. وفي ميتمك ترقع بالصويت 

متستقلش بيها ..اوعى تبقى عبيط ..

هي الحريقة عايزة إيه ..

غير بس عود كبريت ..

*-*-*-*-*-*-*-*-*-*-*-*-*-*

فاتت سنين 

كنت نسيت فيها الحنين  ..

وقلت لو عدت قصادي ..

ولا عليا رجعت تنادي ..

مش هعرفها  ..خلاص نستني السنين ..

وفي يوم .. لاقتها جاية ..

مستحملتش عينيا ..

أغمى عليا ..

يمكن سنين ..

و لما فقت .. عليها سقت ..

سيدنا النبي ..

و الست عايشة و الحسين ..

لاتخف عينيها شوية عني  ..

عقلي خلاص هيشت مني ..

و قلبي فرفر م الحنين  ..

قال إيه .. نستني السنين  ..

*-*-*-*-*-*-*-*-*-*-*-*-*-*-*

ماعرفش ليه أنا لما اشوفك .. باطير .. و أحلق ..

و فيكي أسرح .. و عقلي يجري ..و مين اللي يلحق ..

هي المرايا برضه معايا .. فيكي بتحقق ..

النظر ليكي مش كفاية .. تسمحيلي أبحلق ..؟!!

فكرة 1

تفتق ذهني المتواضع عن فكرة أن نحلل الحوارات الصوتية لبعض السادة الأفاضل قادة الثورة ك فتحي سرور و زكريا عزمي و غيرهم إلي إتضح انهم كلهم كانو ضد مبارك ، لمعرفة مدى الصدق من الكذب ، و بما إن عرضهم على أجهزة كشف الكذب متعذر لأنهم سادة أفضل أولاً و لعدم جدواه ثانياً ، لجأت إلى صديق أستاذ في علم الصوتيات و التعرف على الأنماط ، و قال هنحتاج قاعدة بيانات صوتية للمذكورين ، قلت و ماله ، قالي هتكتب كود لتقطيع الحوارات ، قلتله ماشي ، قالي لازم عشان ندرب النظام تجيب مقاطع صوتية أكون متأكد انهم صادقين فيها ... لحد هنا و معرفتش أقوله إيه ....