حكاوي 4

لحد دلوقتي .. ومن قبل حتشبسوت وتوت ..

محدش بيتعلم .. مهما العبر عليه تفوت ..

لسة الفراش بينط في النار .. طالب النور .. وبيموت ..!!

لسة السمك بيلقط الطعم .. وياخده الشبك .. ويموت ..!!

و فرس النبي بيجري لحبيبته .. وتفرح بخيبته .. ويموت ..!!

ولسة .. ولسة .. و لسة ..

و أدهى من كل دول ..

لسة قلبي بيجري عليكي .. يحضن ايديكي ..

و مش خايف يموت ..

وبيموت ...!!!!

*-*-*-*-*-*-*-*-*-*-*-*-*-*-*

وبتسأليني ليه .. على فراقها مش حزين ..؟؟

والدمع مش دمعي .. ولا كواني الفراق ونار الحنين ..

بقى بعد ماشفتها بتموت .. كل يوم قدام عينيا ..

ووقفت عاجز .. ولا شئ قدرت عليه اديا ..

بقى بعد ماكسرت روحها السنين ..

عايزاني أحزن .. 

في أول مرة .. أشوف شفايفها متبسمين ..

ازاي عايزاني أكون حزين ..!!

*-*-*-*-*-*-*-*-*-*-*-*-*-*-*

صاحبي حب وعشق .. حس الدنيا جريت عليه .. وبتواعد ..

وحس إنه طال النجوم .. وحضن الشمس .. وكسر كل القواعد ..   

ولما وقع .. قال الحقني لاهلك .. حبيبي فاتني ولا مين يساعد ..

قلتله  .. هو الهلاك والعشق إيه .. ماهمه واحد ..

*-*-*-*-*-*-*-*-*-*-*-*-*-*-*

ميت ألف حرب جنبنا عدوا ..

وميت ألف قاطع طريق .. على غيرنا سدوا .. وعدوا ..

وميت ألف ريح لبيوت غيرنا هدوا .. و عدوا ..

وسألت حكيم بلدنا ..

لية علينا لا عدوا .. ولا هدوا ..

قالي ماحنا مضروبين جاهز .. من قبل ما يعدوا ..