من تخاريف صرصور الحقل 2

بعد حفل قصير (لا أذكر مناسبته) بعده ايام، تلقيت مكالمه من صديقه قديمه حضرت معي هذا الحفل، واخذت تشيد بالقوه الخارقه التي تتمتع بها عيناي. ضحكت وظننت انها تظن أني قد حسدت أحدا فأصابته مصيبه جلل لاقدر الله. أخبرتني ان سبعا من صديقاتها اخبرنها في أوقات متفاوته بعد الحفل، وكل على حده، كل منهن ادعت بأني لم أرفع عيناي عنها طوال الحفل (عن كل واحده فيهم وليس عن صديقتي لعدم اللبس) وقالت لابد اني اتمتع بقوه خارقه كي احدق في سبع بنات طوال الحفل وكل واحده تعتقد اني لم أرفع عيناي عنها. ضحكنا كثيراً وانهينا المكالمه على أمل اللقاء في مناسبه أخرى. لا أدري لماذا تملكني الحزن بعدها، ربما لأن الوحيده التي نظرت لها لم تلقي لنظراتي بالا... ربما.

حكاوي.. 6

قد ايه مابينا الكلمه بتسافر..
قد ايه بنكدب على نفوسنا..
وبنكابر..
يبقى مابينا خطوتين..
ونزرع فيهم جبال..
وحدود..
وسدود..
وكام ساتر..
اه ياساتر..

================================

وسرقوا مني افراحا لست أعلمها..

وقالوا فرحي مدفون باحزاني..

وتركوا لي بسمات كنت احلمها..

وقالوا احلم.. فإن الحلم مجاني..
================================

أرض الغلابه

أرض الغلابه.. 

أرض العجايب.. 

فيها لا انت حاضر.. 

ولا انت غايب.. 

فيها ياخدوا قمحك.. 

ويمحوا ملامحك.. 

يهينوك وتدعي.. 

سيدك يسامحك.. 

م الغلب تلقى.. 

شبابها شايب..

حاضر يا سيدي.. 

أمرك ياسيدنا.. 

ما انت ابن تسعه.. 

وهو ابن سته.. 

تديله عمرك حته حته.. 

وتفضل ياغلبي.. 

العمر وانت.. 

م السيد ده هايب.. 

والسيد ده هايب..

يا أرض الغلابه.. 

نصيبك نسيبك.. 

بنجري ونهرب.. 

من ظلم سيدك.. 

ضحكت وقالت.. 

هتقدر يافالت.. 

في البحر تزرع وتحصد ياخايب.. 

دي أرض الغلابه.. والكل شارب..

7/95

اقدر

انا اقدر اهدك ميه مره..

في اليوم.. والساعه لو حبيت..

انا اقدر اشدك على بره..

كون عقلك..

ويقولوا اتجنيت..

انا اقدر اخلخل في مشاعرك..

وتشد في وعيك وف شعرك..

واخلي الحلم اللي بنيته..

يطرح كوابيس..

مهما اتغطيت.. 

ده يعني.. يعني.. 

لو حبيت..

انا اقدر 

بس انت تقرب.. 

واتورط.. 

واتغرب فيا.. 

انا فيا.. مشاعرك منفيه.. 

وباقرط.. على حلمك بجروح.. 

وباوسع.. في دواير المسموح.. 

مش ليك ياحاببني.. 

لأ ليا.. 

واتشرط.. 

تتفرفط بيا.. وعشاني.. 

وتدوخ حواليا.. 

بس انت تعالى.. 

وقول حبيت..

انا اقدر اخليك ليا وبس.. 

واستخسر فيك انا كل قليل.. 

وتكتبلي اليوم وبكره وأمس.. 

وتلملي كل نجوم الليل.. 

وتعملهم عقد بنور الشمس.. 

وامصمص في شفايفي واقول.. 

لا بأس.. 

حاول تهتم.. اكتر بكتير.. 

انا حبي خطير 

هايخلي اعلى طموحك يأس.. 

مش سبت الدنيا.. 

وليا هويت.. 

البس يا....

من تخاريف صرصور الحقل 1

وكنت فاكر انك تصون..
اهبل انا؟!
ولا عشان..
اسهل كتير انك تخون..

...

بلاش ماشي..
بلاش طيب..
بلاش معلش..
لو هتقولها سد كلام..
اكيد هتوش..

خليني اتكلم

كنت ماشي خلاص..
وعليكي باسلم..
عينيكي نادتني..
قالتلي..
تعالى.. اتكلم..
خد حزني..
إسألني..
خليني اتكلم..
خليني افضفضلك..
احكيلك..
روحي ليك اسلم...
واتصرف..
ريحها..
طيرها في مطرحها..
بعترها..
وارجع..
ليها لملم..
فكرها..
نسيها..
ضحكها وبكيها..
بس اوعى تخليها..
للحزن تسلم..
اتكلم..
كلمني..
خليني اتكلم..

أحمد عبدالسلام 12/4/1997

ويل لأمة

ويل لأمة تكثر فيها الطوائف وتخلو من الدين

ويل لأمة تلبس مما لا تنسج ، وتأكل مما لا تزرع، وتشرب مما لا تعصر

ويل لأمة تحسب المستبد بطلا"، وترى الفاتح المذل رحيما"

ويل لأمة تكره الشهوة في احلامها وتعنو لها في يقظتها

ويل لأمة لا ترفع صوتها الا اذا مشت بجنازة، ولا تفخر الا بالخراب ولا تثور الا وعنقها بين السيف والنطع

ويل لأمة سائسها ثعلب، وفيلسوفها مشعوذ، وفنها فن الترقيع والتقليد

ويل لأمة تستقبل حاكمها بالتطبيل وتودعه بالصفير، لتستقبل اخر بالتطبيل والتزمير

ويل لأمة حكماؤها خرس من وقر السنين ورجالها الاشداء في اقمطة السرير

ويل لأمة مقسمة الى اجزاء وكل جزء يحسب نفسه أمة

جبران خليل جبران حديقة النبي 1933

نفسي مانكونش الأمة دي

الكادر

اضبطلي الكادر على الدمعه ..

ركز على عيني ..

طلعني وحيده ..

والناس لألامي ماهيش سامعه ..

لأ شيل المشهد التاني ..

انا كنت بازعق حياني ..

كده زعله هيطلع في الصوره ..

خلي بدايه الحدوته دايما

وانا مظلومه وتايهه ومقهوره ..

لأ مايهمش ..ترتيب أحداث ..

مايهمش مين غلط الأول ..

ولا مين انداس ..

قرب بالعدسه على جفوني ..

خلي سوادهم هو الدنيا ..

واعمل زووم ان ..

عاللي جافوني ..

انا عايزه كل ردود فعله ..

تبقى الأفعال ..

صغر افعالي .. امحيها ..

خليها حلال ..

هنقص من القصه شويه ..

دي حكايتي وانا حره احكيها ..

انشالله اخلي النار ميه..

ايوه والمشهد ده .. ده كمان الغيه ..

انا باضحك فيه ..

مبسوطه وهو سبب فرحي ..

انا عايزه بس يبان جرحي ..

افهم ياسفيه ..

مايهمش هنشيل كام مشهد ..

كلها كادرات ..

خليلي بس اللي هايشهد ..

اني اتحملت دموع وآهات ..

خلصنا خلاص ؟؟!!

اعرضلي النسخه النهائيه ..

اممم .. والله القصه جميله ياناس ..

امسحلى الباقي من الميموري

ماعرفش ازاي ..

اتصرف اومال مخ ازاي..

واكتب عالنسخه كتاب عمري ..

اصل ومش عايز اثبات ..

احمد عبدالسلام

مارس 2018

احلام..

يوم السفر..
والدي قاللي..
قول يارب..
تقلت حمولك..
وياه بيتخفوا..
وحرص لنفسك..
أماره هي..
وشياطينها بيتخفوا..
وامي قالتلي تقل هدومك..
اي حاجتين فوق بعض..
بيدفوا..
وبرد المشاعر..
شوفله ونيس..
ياخدك على كفه..
دي الغربه والوحده..
جناحات لدور.. ياما..
دمع العينين صفوا..
وادي السنين دارت..
والمركبه اختارت..
100 شط تفارقهم..
وكل احلامي..
من عقلي لخالقهم..
في الصمت يتزفوا..
انجزت ياما كتير..
احلام كتير غيري..
وحلمي اللي ماسكنتوش..
بادفع ايجاره رتوش..
على رسمه لمصيري..
ممضيه " أنا مسيري"
اتغطى انا بحلمين..
فوق بعض..
بيدفوا..

احمد عبدالسلام
مارس 2018