رمضان

يارب جه رمضان..  وقلوبنا ماجاياشي..
سبنا أكل وشرب..  والباقي ماسبناشي
لو الشيطان متكتف.. ذنوبنا ليه بتتستف..
يارب غيتنا..  عملنا اهه..  ماغتناشي..

رسالة

الى من يحاولون محاربة القدر ..

الى من يستلذون دماء البشر ..

الى   من    يسبحون في بحر الدماء ..

الى من يكرهون سحب السماء

لأنها ..

على غيرهم أسقطت المطر

الى من سمموا مياه البحور ..

و بعد البشر يأكلون الزهور ..

و يفزعون إذا هم طفل بـرمى حجر ..

الى من يفاوضون باسم السلام

و ترك السلاح و حفظ النظام

و عن بغيكم يغضون البصر ..

تذكروا ..

أن من يرعونكم ..

كانوا ..

و بكم مازالوا رعاة بقر

و تذكروا .. ان من جعل لكم مكانا تحت الشمس ..

جعل لكم مكانا فى نار ألف شمس ..

مكانا  .. في ســـقر

ما يحكمشي

إحنا اللي دهنا الهوا أحكام ..
و بعنا بكام ؟ ..
ما قوللكشي  ..
إرجع ياعم اتغطى ونام  ..
ماهي الأحلام ..
في غير النوم ..
ما بتجوزشي ..
و صوتك واطي عن صوتك .. ب ألفين عام  ..
و قفاك قدام ..
ف شئ زيك .. ما يحكمشي ..
    ما يحكمشي ..

أرض الغلابة

أرض الغلابة .. أرض العجايب

فيها لاانت حاضر و لا انت غايب

فيها ياخدوا  قمحك و يمحوا ملامحك

يهينوك و تدعى سيدك يسامحك

م الغلب تلقى .. شبابها شايب

حاضر يا سيدى .. أمرك يا سيدنا

ماانت ابن تسعة و هو ابن سته

تديله عمرك حته حته

و تفضل  يا غلبى العمر و انت

م السيد ده هايب و السيد ده هايب

   يا أرض الغلابه .. نصيبك نسيبك

بنجرى و نهرب .. من ظلم سيدك

ضحكت و قالت .. روح لو هتقدر

فى البحر تزرع و تحصد يا  خايب

                          دى أرض الغلابة.. أرض  العجايب

7/95 

إضحكي ..

بس إضحكي ..

ضحكه منك تشد قلبي لسما السما فوق ترفعه ..

وضحكه تانيه تشد قلبي للأرض تاني ترجعه ..

ده انتي لو ماضحكتيش في يوم .. الشمس ترحل ..

والورد يدبل .. والفجر ينسى مطلعه ..

الضحك ده مخلوق لكي.. يالا اضحكي ..

ده أقل دمعة حزن تمس عينك .. تذل قلبي وتوجعه ..

والاقي قلبي إجنّ وأنّ كإن حيه بتلدعه ..

ده صوت حزنك لو ماسمعتيهوش .. أنا هاسمعه ..

فتعالي نقفل عالحزن باب باقفال حديد ونشمعه ..

فبلاش في الحزن تتمحكي .. يالا اضحكي ..

ده انتي لما بتضحكي .. حزني يلقى مصرعه ..

وقلبك يرش بذور هواكي وفي قلب قلبي يزرعه ..

والنجوم تعمل حزام لقلبي .. وترقصه وتدلعه ..

والقمر يترجى فيا ..و أعمل عبيط ولا بسمعه  ..

وكل ده وبتتلككي .. سيبك بقى يالا اضحكي ..