كل عام

كل عام وانتم تمام.. 

كل عام وانتم بخير.. 

 كل عيد وانتوا في هدايه 

والصلاح ليكوا خط سير.. 

كل عام واحبابكوا بيكوا.. 

عايشين احلى كل ثانية.. 

كل عام وولاد عينيكوا 

مفرحينكوا دين ودنيا.. 

كل عام وبلادنا خارجه.. 

من تحت رجلين الكلاب.. 

والشيطان اللي مابينا.. 

مايلاقيش للفتنه باب.. 

كل عام وانتم احبه

كل عام وانتم بخير

2014

بتهون

هونها تهون..

يعني بتهون على احبابك.. 

قبل الأغراب.. 

ومين منك.. 

اداك في جنابك.. 

ومشيتها عتاب.. 

واحلامك قفلت ابوابك.. 

 وقلت نصيب.. 

وصحيح غلاب.. 

وتهون على نفسك.. في غيابك.. 

ولا وجودك.. 

ما الفرق سراب.. 

مش عارف ليه تستهونها.. 

هتهينك.. قبل ماهتهينها.. 

واخرتها تراب.. 

هونها تهون.. 

وخده في ايدك.. 

.......................... !!! 

انا قصدي الباب... 

كل الجبهات

في حته هناك..

بيقولوا انها لسه سليمه.. 

ولا خانها حبيب.. 

ولا هانها قريب.. 

ولا ظرف طحنها ببريمه.. 

في حته الأيام ماشافتهاش.. 

شرايين لسه مطلعتش معاش.. 

لسه بتحاول.. وتناول.. 

عقلك احلام وآمال تتعاش.. 

ورغم ان النور.. حالف مايزور .. 

أرضها لكن.. 

بتحسس.. جوه التعتيمه.. 

في حته هناك.. 

حواليها اشواك.. جواها ورود.. 

لابتاخد ولاتدي في وعود.. 

ولا قالت اه.. ولا قالت لأ.. 

بكر ماتعرفشي غير الحق.. 

مالهاش في الزق.. 

ولاليها حدود.. 

وطريقها مافيهوش تخريمه.. 

في حته هناك لسه سليمه.. 

في حته في قلبك ليها قيمه..

وشافوها ولاد الهريمه.. 

غلبان

غلبان ياسيدي ..

ولاليك أمارة ..

خرمان وطالب ..

لأ .. مش سيجارة

حبة محبة .. قربلي حبة ..

بتقوللي لأ ..؟! 

أكونش طالب منك عمارة ..

تقلان عليا ..

والتقل صنعة ..

شاغل عينيا .. 

ومافاضلشي دمعه ..

سلفني بصة .. اية هيا قصة ..؟! 

تكونشي يعني ..

عينك ممانعة ..

بذور

انا عشت زمان..

بزرع في حاجات مستني تبان.. 

ازرع بسمه.. تطلع احزان..

ازرع في صفا.. 

يتشبر جَوهُ من الأغصان.. 

وطلعلي جفا.. 

مع اني غرست البذر حنان.. 

وقبل ما اسلم.. 

واقول ماخلاص عيش واتألم.. 

سقيتها بدمعه.. 

طلع الرمان.. :) 

مكانش ‏عليه ‏اسم ‏حبيبي

جرحوني كتير..

وقبلت الجرح بكل مافيه.. 

ده انا حتى ساعات.. 

كان يمكن.. ممكن.. 

أفرح بيه.. 

مادام الجرح مكانش بقلب.. 

انا خفت عليه.. 

مادام من قلب.. غير اللي سهرت.. 

معاه لياليه.. 

مادام من روح.. 

عايزاني مجروح.. 

مكنتش أبداً حاسس بيه.. 

مسألتش ابدا.. ازاي أو ليه.. 

طب هاسأل ليه.. 

مادام الجرح مكانش عليه.. 

اسم حبيبي.. 

راح اكون مرتاح.. ولو كلي جراح.. 

حبيبي طبيبي.. 

لاهاخاف من ليل.. ولا بعد وويل 

ولا أقول مووايل.. 

عن سهري وسهدي وتعذيبي.. 

مادام الجرح مكانش عليه.. 

اسم حبيبي.. 

ماهو مش معقول.. انا ليلي يطول.. 

وحبيبي بيقول.. 

أنا بحبك.. 

ولا ممكن أحس.. بغياب الشمس.. 

وحبيبي بهمس.. 

قاللي انا جنبك.. 

ولاممكن ابدا الاقي في جرحي آلام.. 

ووجوده معايا.. مخليني.. م الفرحه ما أنام.. 

هافتكر الجرح.. ازاي والفرح.. 

طول ماهو جنبي هو نصيبي.. 

هافتكره ازاي.. ومكنش عليه.. 

اسم حبيبي.. 

احمد ع. مصطفى 

30.12.1998

وعدتيني

وعدتيني..

لو الشمس بخلت عالقمر بالنور.. 

نورك يكفيني.. 

لو الأنهار والبحور صبحت بور.. 

عنيكي ترويني.. 

ولا كان في بالي في يوم.. 

انه هييجي اليوم.. 

وبعد ماتوعديني.. 

هتوئديني.. 

وعدتيني ومن وعدك.. 

رسمت قلب بريش وجناح.. 

وخده وعدك وطار عالي.. 

رماه من رياح لرياح.. 

وحلم بيكي وحلم ليكي.. 

ومن وعدك كتب أشعار.. 

ولقى وعدك كلام من ليل.. 

عدى عليه الصباح مالاح.. 

مسح الصباح وعدك ووعدك.. 

مسح قلبي وكسر له جناح.. 

وعدتيني وطار قلبي.. 

ورا وعدك وكان ماكان.. 

وصار هايم كطير رحال.. 

لاله لادار ولاعنوان.. 

وشكى حزنه لنجوم الليل.. 

لشمس الفجر.. وفضل سهران.. 

سأل من فات على وعدك.. 

وإيه هيكون بعد ماخان.. 

قالوله الدنيا دي دايره.. 

ومسير من خان في يوم يتخان.. 

وعدتيني وهييجي اليوم.. 

واقول من قلبي على غيرك.. 

وعدتيني.. وصدقتي الوعد..