غلبان

غلبان ياسيدي ..

ولاليك أمارة ..

خرمان وطالب ..

لأ .. مش سيجارة

حبة محبة .. قربلي حبة ..

بتقوللي لأ ..؟! 

أكونش طالب منك عمارة ..

تقلان عليا ..

والتقل صنعة ..

شاغل عينيا .. 

ومافاضلشي دمعه ..

سلفني بصة .. اية هيا قصة ..؟! 

تكونشي يعني ..

عينك ممانعة ..

بذور

انا عشت زمان..

بزرع في حاجات مستني تبان.. 

ازرع بسمه.. تطلع احزان..

ازرع في صفا.. 

يتشبر جَوهُ من الأغصان.. 

وطلعلي جفا.. 

مع اني غرست البذر حنان.. 

وقبل ما اسلم.. 

واقول ماخلاص عيش واتألم.. 

سقيتها بدمعه.. 

طلع الرمان.. :) 

مكانش ‏عليه ‏اسم ‏حبيبي

جرحوني كتير..

وقبلت الجرح بكل مافيه.. 

ده انا حتى ساعات.. 

كان يمكن.. ممكن.. 

أفرح بيه.. 

مادام الجرح مكانش بقلب.. 

انا خفت عليه.. 

مادام من قلب.. غير اللي سهرت.. 

معاه لياليه.. 

مادام من روح.. 

عايزاني مجروح.. 

مكنتش أبداً حاسس بيه.. 

مسألتش ابدا.. ازاي أو ليه.. 

طب هاسأل ليه.. 

مادام الجرح مكانش عليه.. 

اسم حبيبي.. 

راح اكون مرتاح.. ولو كلي جراح.. 

حبيبي طبيبي.. 

لاهاخاف من ليل.. ولا بعد وويل 

ولا أقول مووايل.. 

عن سهري وسهدي وتعذيبي.. 

مادام الجرح مكانش عليه.. 

اسم حبيبي.. 

ماهو مش معقول.. انا ليلي يطول.. 

وحبيبي بيقول.. 

أنا بحبك.. 

ولا ممكن أحس.. بغياب الشمس.. 

وحبيبي بهمس.. 

قاللي انا جنبك.. 

ولاممكن ابدا الاقي في جرحي آلام.. 

ووجوده معايا.. مخليني.. م الفرحه ما أنام.. 

هافتكر الجرح.. ازاي والفرح.. 

طول ماهو جنبي هو نصيبي.. 

هافتكره ازاي.. ومكنش عليه.. 

اسم حبيبي.. 

احمد ع. مصطفى 

30.12.1998

وعدتيني

وعدتيني..

لو الشمس بخلت عالقمر بالنور.. 

نورك يكفيني.. 

لو الأنهار والبحور صبحت بور.. 

عنيكي ترويني.. 

ولا كان في بالي في يوم.. 

انه هييجي اليوم.. 

وبعد ماتوعديني.. 

هتوئديني.. 

وعدتيني ومن وعدك.. 

رسمت قلب بريش وجناح.. 

وخده وعدك وطار عالي.. 

رماه من رياح لرياح.. 

وحلم بيكي وحلم ليكي.. 

ومن وعدك كتب أشعار.. 

ولقى وعدك كلام من ليل.. 

عدى عليه الصباح مالاح.. 

مسح الصباح وعدك ووعدك.. 

مسح قلبي وكسر له جناح.. 

وعدتيني وطار قلبي.. 

ورا وعدك وكان ماكان.. 

وصار هايم كطير رحال.. 

لاله لادار ولاعنوان.. 

وشكى حزنه لنجوم الليل.. 

لشمس الفجر.. وفضل سهران.. 

سأل من فات على وعدك.. 

وإيه هيكون بعد ماخان.. 

قالوله الدنيا دي دايره.. 

ومسير من خان في يوم يتخان.. 

وعدتيني وهييجي اليوم.. 

واقول من قلبي على غيرك.. 

وعدتيني.. وصدقتي الوعد.. 

هتعيش

عقلك مقفول..

والدنيا معانداك عرض وطول.. 

والعقل اللي مفيش غيرك حيلته.. 

زهقان منك.. كاره شيلته.. 

افكارك مبقتش في عيلته.. 

ومنك بتزول.. 

وبييجي الجرح من مؤتمنه .. 

كله بيبيع.. كله بتمنه.. 

الغالي بيرخص لو زمنه.. 

مش ابن اصول.. 

بتلاقي الكل بقم اغراب..

متاهه كبيره حقيقتها سراب.. 

تفتح في ابواب.. 

تقفل على طول.. 

وخطوط ياما... 

كنت بتسندها زمان ياما.. 

لاقبلت فيها تتحامي.. 

وتديك مشغول.. 

وتحاول تحكي وتفضفض.. 

بتلاقي السامع بينفض.. 

والكل في ذلك بيقول.. 

كلنا موحول .. 

الشكوى لغير الله مذله.. 

تحكي يمسكها عليك ذله.. 

فلو لازم.. 

خليك للخالق مذلول.. 

مما قلت ..

- ذلك السكون المنبعث من بيت ملئ بالناس، وتلك الضوضاء اللعينه المنبعثه من بيت خاو.. 

- فقدتها مساء ذلك الثلاثاء،

وبعد خمس وعشرين عاماً،

لم يأت صباح الأربعاء الى الآن. 

-- كل مانختبره يقول.. احتماليه اصابتك بنيران صديقه اكبر بكثير من نيران اعدائك.. واكثر ايلاما بما لايقاس.

- أنا أؤيد القول بأن التصوير حرام ..  فالذكريات على قدر سعادتها ..قاتله ..
- في أهلي وزمالك خليكم .. تيران وصنافير مش ليكم ..

- أصعب حاجه في الدنيا، تبني في حد بيهد فيك. لله الأمر من قبل ومن بعد.

-- يابني بلاش النظره المتشائمه دي، بص لنص( أو ربع ) الكبايه المليان. 
 ++ يابن اللذينا، انت عندك كبايه كمان.

- طنشوا ياجماعه وعيشوا، لازم تعيش كل يوم كأنه أخر يوم ليك.. وصدقني.. صدقني.. يوم من الأيام دي.. هتكون علي حق.. 

- ( من قتل نفسا بغير نفس أو فساد في الأرض فكأنما قتل الناس جميعا ومن أحياها فكأنما أحيا الناس جميعا )
 تقريبا في بعض شيوخ السلطان فسروا هذه الأيه على انها متساويه حسابيه، فبقت من قتل الناس جميعا فكأنما قتل نفسا واحده!!

- كيف إحتل طيفك عقلي .. حتى أصبح النوم مرهقا 

- نحن في بلد تحاكم فيها الدمى على أخطاء المحركين ، و يشارك المحركون في تنفيذ الحكم ..

- أغبى سؤال ممكن تسمعه عال فيسبوك ... عندك إيميل ؟!! يمكن داخل الفيسبوك ب كارنيه النادي ..

- ومازال الغباء مستمرا .... بنجاح ساحق .

- على مر العصور يسرق الملوك والقواد من الجنود كل شئ.. حتى موتهم واستشهادهم..

- عارفين اللي لقى كنز قام قال الحمدلله وسابه و قعد يدور عالخريطه ..

- واحد صاحبي كان قاصد يبعتلي الدعاء ده :

 اللهم بلغنا رمضان واهلنا ومن نحب..

عمنا ال auto correct بقى خلاها :
اللهم بلغنا رمضان واهلكنا ومن نحب..

حتي ده بيتأمر علينا...

- هو احنا ازاي بقينا الفاصل الكوميدي بتاع الكوكب..

- اللي يشوف كلام الناس عال فيسبوك ، أو في الشارع يحس إننا بلد فريدة من نوعها فعلا ، بلد بحالها ماتربتش ..

- احنا في بلد " اللي تعرف ديته اقتله " فما بالك باللي ملوش ديه

- إبقى معي .. أريد أن أكون وحدي ..

- في ناس عندنا عندهم قوة إرادة غير طبيعيه ولم يسمحوا لتعليمهم مهما علي مستواه إنه يقف قدام جهلهم مهما وطي مستواه 

-  إذا كان الساكت عن الحق شيطان أخرس ، ما حال الناطق بالباطل والعامل به ، والمدافع عنه ...

- لماذا تغضب النساء حينما يقال ناقصات عقل و دين ، في بلد أغلب قاطنيها بلا عقل و لم يسمعوا عن الدين إلا من مدعية ، أعتقد أن هذا القول يصبح من قبيل المدح .....

يوم

كان يوم مالوش في حياتي زي ..

الفرح كان ويانا حي ..

والضحكه صادقه من قلوب ..

بتحب بعض ودايبه دوب ..

بتلعب وتجري كانها ..

خايفه لايخلص عمرها ..

وبتحاول تنسى ان النهارده ..

مش هييجي بعده زي ..

كان يوم فرح ..

قلبي بالأفراح طرح ..

وقعد يمللي عينيه كتير .. 

من ناس كتر .. 

ضحكوا سوا .. وحزنوا سوا ..

حتى الهوا شموه سوا ..

وطلنا بايدينا السحاب ..

وبكى السحاب ..

وغنينا تحت بكاه كتير ..

لحد ماقرص الشمس غاب ..

وابتدينا نبكي احنا ..

ودموعنا وصلت للسحاب ..

وبقى كل اللي يشوفنا ..

مايعرفش مين صاحب المطر ..

السحاب ولا الصحاب ..

ووعد زايف باللقا ..

بدموع فراقنا يتسقى ..

ونبعد لكن اليوم بقى ..

جوانا حي .. مش هييجي بعده زي ..