احبك

احبك حتى استعانت حروفي.. 

باسمك حتى يكون الكلام.. 

وهمست يداي بلمسك شعرا.. 

يحاكي ملوك الهوى والغرام.. 

وطيفك صال بعقلي حروبا.. 

ويأبى فؤادي دعاة السلام.. 

نظرت اليك فحارت عيوني.. 

اإغماض جفنيَّ عنك حرام؟!

مابين .. وبين ..

مابين شاويش .. وبين درويش ..
صبحنا مافيش ..
وكله يموت ..
عشان مايعيش ..
واحد منهم ..
والتاني ..
يلف الدايره من تاني ..
يا اما بخطبه في الجامع ..
يا اما بحرب عالتاني ..
والحرافيش ..
مابين الجاني والجاني ..
بيجروا وينسوا في ثواني ..
حريه .. عداله ..وعيش ..
هنا الظالم .. تلاته ولا بس اتنين ؟
اقولك ؟!! .. ولا مافيش ..
وتوته توته .. حمضت الحدوته ..
وخلينا في طاحونه العيش ..

احمد عبد السلام مصطفى ..

اليتيم

كان مولود يتيم الحزب..
ولا ليه لا ام ولا جماعه..
وعاش امله يفوت م الغلب..
ولا يشوف ظلم..  ولا مجاعه..
لكن ماعرفش..
ورغم الرغم عاش صابر..
وحاول يمشي جوه الحيط..
ودعا لظالمه "تنه عامر"..
فسرقوا منه حتى الحيط..
وهدوا العش..
ولما قام عمل ثوره.. 
خدوها اخوانه بالغلبه..
وخفي العسكر وخد دوره..
ورجع داسهم كما العتبه..
ماهي الثوره في ايد اليتيم عجبه..
لكن معلش.. 
مسيرها تقوم.. وتمحيهم..
مسيرها تقش..

كيس بلاستيك

كيس بلاستيك ..

 مقطوعه ايده .. 

ملفوف بأستك ..

 مخبي فيه كل اللي حيلته ..

 فوطه صفرا .. 

ونص صوره للواد وعيلته ..

 وكتاب قديم ..

 والقطر فايت .. 

كل مرة .. مابيلحقوش 

وهم بايت .. مابيسيبوش .. 

تمسح يابيه ؟ ابعد ياواد بتهبب ابيه !!! 

تمسح يابيه؟ 

ياخدله شتمه ولعنتين .. من ورا ازاز الفيميه .. 

تمسح يابيه؟ امسح ياواد .. يديه جنيه ..

 يفرح يطير ..

 يفتح الكيس البلاستيك ..

 ويحطه فيه ..

 ويستخبى ..

 خايف عليه 

ويقول يارب ..

 خيرك كتير ..

 اكرمنا بيه.. 

احمد عبدالسلام-23/1/2008

اول

اكدبي تاني وتالت
مانتي كنتي ساقطه اول..
والعبي دور الشهيده..
الحكايه مش هاتطول..

الحكايه منتهاها..
فكره واخداكي لمصيرك..
كبريائك مبتداها..
والنهايه حد غيرك..
حد يرضى.. حد يفضل..

قسمه اتنين عالتلاته..
راح تطول العمر كله..
مابتقفش الا ما واحد..
يحب غيره ويتنازله..
ده الخناق على خرج قسمه..
طرح أخر.. شطب اول..

اقطعي وريد الرجوع..
وانسي انك كنتي ليا..
مهما كانت الدموع..
عمرها ما رجعت عنيا..
كنتي دمعه جت وراحت..
بس خدتي.. 
جوه عيني وقت اطول..

كنت دايما

كنتي دايما ..
بيني وبين الكلام ..
وبيني وبين الصمت .. السكه مفتوحه..
كل المعاني تدوب
في همسه بتقول سلام..
وتنهيده مجروحه ..
جمع الالم ..عاصي ..
وهوايه الساكتين ..
والكلمه لو بلسم ..
تفتكري تجرح اقل ..
محطوطه عالسكاكين ..؟

انا غلطان ..

انا غلطان ..

والانسان .. على حس اخوه عايش..
ولسه بيكره الطغيان ..
والعنوان ..
بتاع الامل معروف ..
ماهوش كرباج في ايد سجان ..
وانا غلطان ..
والالحان ..ماهيش مسروقه ولا حاجه..
ولا بتمدح جزم سلطان ..
والعالي .. لاهو نصاب ولا قاتل
والواطي .. مكانش عزيز وذله زمان..

وطير الرخ متواجد ..
والعنقاء .. بترفرف على البستان ..
وانا غلطان ..