مش عارف

معرفتش اقول ولا كلمه 

عنك وفراقك خد صوتي..

خد مني اقلامي وكراريسي.. 

والبسمه اللي مأجله موتي..

انا وانت اتنين كنا في واحد.. 

وواحد فيهم ساب نفسه وراح.. 

انا وانت براح.. 

اصبح ضيق.. 

روح بتزيق.. على بكره الجاي.. 

طب اعمل ايه.. 

والناس بتقوللي خلاص جرى إيه..

واللي مجربش هيعرف ايه.. 

جربت تصاحب شئ منك..

وتقوله انا عايزك ويايا.. 

ليه تبعد.. اخرك جوايا.. 

ومعايا اكمنك.. انا منك.. 

جربت تقابل أحلامك ..

مطرح ماتقابلك كوابيسك..

ومعاه تتعاهدوا.. وترابيسك .. 

تتفتح.. تضحك أيامك..

جربت تواعد يوم همك..

على ناصيه بسمه يادوب هتبان..

والدنيا عيان.. 

وسايبينك.. 

ومحدش غيره معاك ددبان.. 

لو جربت.. اكيد عارف

معنى ان انت بقيت مكشوف.. 

واللي مجربش.. 

اهه صعب يشوف.. 

الحدوته

انا كنت..

وبقيت.. 

ومابينهم.. 

رحت وجيت.. 

وكام يوم منهم حبيت.. 

وارتحت.. 

وشقيت.. 

وضحكت.. 

وبكيت.. 

وادي كل الحواديت.. 

كل عام

كل عام وانتم تمام.. 

كل عام وانتم بخير.. 

 كل عيد وانتوا في هدايه 

والصلاح ليكوا خط سير.. 

كل عام واحبابكوا بيكوا.. 

عايشين احلى كل ثانية.. 

كل عام وولاد عينيكوا 

مفرحينكوا دين ودنيا.. 

كل عام وبلادنا خارجه.. 

من تحت رجلين الكلاب.. 

والشيطان اللي مابينا.. 

مايلاقيش للفتنه باب.. 

كل عام وانتم احبه

كل عام وانتم بخير

2014

بتهون

هونها تهون..

يعني بتهون على احبابك.. 

قبل الأغراب.. 

ومين منك.. 

اداك في جنابك.. 

ومشيتها عتاب.. 

واحلامك قفلت ابوابك.. 

 وقلت نصيب.. 

وصحيح غلاب.. 

وتهون على نفسك.. في غيابك.. 

ولا وجودك.. 

ما الفرق سراب.. 

مش عارف ليه تستهونها.. 

هتهينك.. قبل ماهتهينها.. 

واخرتها تراب.. 

هونها تهون.. 

وخده في ايدك.. 

.......................... !!! 

انا قصدي الباب... 

كل الجبهات

في حته هناك..

بيقولوا انها لسه سليمه.. 

ولا خانها حبيب.. 

ولا هانها قريب.. 

ولا ظرف طحنها ببريمه.. 

في حته الأيام ماشافتهاش.. 

شرايين لسه مطلعتش معاش.. 

لسه بتحاول.. وتناول.. 

عقلك احلام وآمال تتعاش.. 

ورغم ان النور.. حالف مايزور .. 

أرضها لكن.. 

بتحسس.. جوه التعتيمه.. 

في حته هناك.. 

حواليها اشواك.. جواها ورود.. 

لابتاخد ولاتدي في وعود.. 

ولا قالت اه.. ولا قالت لأ.. 

بكر ماتعرفشي غير الحق.. 

مالهاش في الزق.. 

ولاليها حدود.. 

وطريقها مافيهوش تخريمه.. 

في حته هناك لسه سليمه.. 

في حته في قلبك ليها قيمه..

وشافوها ولاد الهريمه.. 

غلبان

غلبان ياسيدي ..

ولاليك أمارة ..

خرمان وطالب ..

لأ .. مش سيجارة

حبة محبة .. قربلي حبة ..

بتقوللي لأ ..؟! 

أكونش طالب منك عمارة ..

تقلان عليا ..

والتقل صنعة ..

شاغل عينيا .. 

ومافاضلشي دمعه ..

سلفني بصة .. اية هيا قصة ..؟! 

تكونشي يعني ..

عينك ممانعة ..

بذور

انا عشت زمان..

بزرع في حاجات مستني تبان.. 

ازرع بسمه.. تطلع احزان..

ازرع في صفا.. 

يتشبر جَوهُ من الأغصان.. 

وطلعلي جفا.. 

مع اني غرست البذر حنان.. 

وقبل ما اسلم.. 

واقول ماخلاص عيش واتألم.. 

سقيتها بدمعه.. 

طلع الرمان.. :)