تحيا..

كل الضباع بقوا فوق..
واللي يسقفوا..  يفوتوا..
واللي لابس النسر..
حاكم بجبروته..
واللي انسجن.. كداب..
واللي اتقتل.. كداب..
واللي اتنفى كداب..
والصدق رد الباب..
مشغول يجيب قوته..
هتحيا بس ازاي..
وولادها بيموتوا..

ساعات بانسى

ساعات بانسى..
وباعمل فنجانين قهوه..
وصوت مزمزمتك الغايب..
يزور احلامي على سهوه..
واتغطى.. لايجي الحلم من تاني..
وبيجيلي..  وباستهوى..

ساعات بانسى
وباحجز تذكره زياده..
واحوش الكرسي علشانك..
واشوف اللقطه متعاده..
واضحك ضحكي وياكي..
وابكي.. 
لما كالعاده..
الاقي التذكره زياده..

ساعات بانسى..
وباطلب نمرتك مشتاق..
ترد غريمه العشاق..
"ربما يكون مغلقا"..
مطلقا..!!
عمرك ماقفلتي تليفونك..
واقول يمكن خلص شحنه..
وقال يافراق..

ساعات بانسى..
واخبط خبطتين عالباب..
وادارى.. عشان اخضك..
وترمي في حضني كل عتاب..
وتطول رميتي عالحيط..
وازيد تخبيط..
ومافي جواب..

ساعات بانسى..
اني مستحيل انسى..

غزل بنات

مش عايز تاني غزل بنات..
مادام بالدمع متسكر..
والوانه ماهيش فرحه..
دي أهات طارحه..
وامنيات..
تايهه.. في حلم متعكر..
تغور الطرحه..  والشربات..
وزغاريد الفرح ليله..
لو العمر اتقلب شيله..
كلامه سكات..
مش عايز تاني غزل بنات..

المرض

دورت كتير على الغلط ..

وقلت بالكتير هيكون ..

طريقه أو طبع انفرض ..

لكن المرض مكانش طبع ..

كانت العقول هي المرض ..

كانت العقول جواها ناخر السوس ..

حافر حفر جواها المرض مدسوس ..

شاري ومستشري وداخل جوه النفوس ..

خلى العقول على أهلها بتدوس ..

كانه طوفان .. 

غمى البصيره قبل البصر ..

وعليهم فرد ..

بقت العقول بتفكر ازاي تعذب نفسها ..

ازاي تلاقي طوفان يغمر حياتها .. يهدها ..

ازاي تكسر جسور الود .. بينها وبين من حبها ..

ازاي تخلي أفكار مريضه .. تملك مصيرها ..تشدها ..

لمرض عسير ماله دوا .. لو على مليون طبيب يتعرض ..

كانت العقول أكبر مرض ..

 Ahmed A. Mostafa 1995

طز فش

آه يا أحفاد الفراعنه..
طز فش وألف لعنه..
في اللي قش
واللي رش..
واللي غش..
واللي خاننا واللي باعنا..
طز فش وألف لعنه..

في اللي قسمنا بكتاب.. 
واللي قسمنا بحديث..
واللي قسمنا بقلم.. 
واللي قسمنا بعلم..
واللي قسمنا برئيس..

واللي قسمنا برصاصه..
واللي شافنا نموت ولكن..
دارى عينه ولف راسه..
واللي شاف الظلم بين..
وقال يغور ماهو مش تبعنا..
طز فش وألف لعنه..

ليه طفيتو بدمع ناس..
شمع عشانكم يوم قادوه..
ليه رضيتوا..
وليه طاطيتوا..
والشرف قلتم خدوه..
العدو بقى حضنه جنه..
ومن أخوكم بتعادوه..
جتكوا نيله بكل معنى..
طز فش وألف لعنه..

مايصحش

الورد جه يفتح..
قالوله مايصحش..
والشمس جت تشرق ..
قالولها ماتشقش..
خدوا الغطا في الشتا..
وسحبوا النسيم في الصيف..
وقبل اما ييجي خريف..
خدوا الورق م الشجر..
وقالوله ماتكحش..

لأ …ستة

كل عام وسط السكوت  ..

نفتكر نفتح تابوت …

دفنا فيه لحظة حياة ..

ورجعنا تاني عشنا موت …

****--------******-------*****

قلنا السلام ..

جت الضباع لابسة  حمام ..

ونخورت جوه القلوب ..

مسك الزمام  ...

كل حد ماهوش تمام ..

وبابتسام  ..

وبمنتهى الانسجام ..

بقى احتلالنا منا فينا ..

سد المسام ..

بقى كل شيء بندوقه سام ..

بعد ماعبرنا القناه ..

كافئنا كل من عبر ..

بنيشان جعان ..

ونوط من عدم الإحترام ..

غرقوا ولادهم ..

في عبارات ابن اسماعين ..

ماهو واد متين ..

مفيش كلام ..

بعد ماصادوالدبابات ..

اصطادومنهم ..حتى النفس والأمنيات ..

وقالوا على النصر السلام ..

 ****--------******-------*****

الحلوة دي قامت تعجن في المصرية  ..

وحلفت تطلع عين ابوكوا الأسطى عطية ..

واللي مايدعي لقائد الطلعة .. روحه دي طالعة ..

وحصته في البيت هتروح لكبير الحرامية  ..

****--------******-------*****

كانت آخر فرحة  يابلدي  ..

بعدها مافرحتيش غير يمكن ..

بنتيجة ماتش في جورنان ..

كام ستة أكتوبر عدو ..

ولا جه سادس الخلفا ..

ولا فجرك بان ..

والمصري دايما في سرادق ..

مستشفى ..مدرسة ..دكان ..

كلية .. شركة .. بستان  ..

واقف ياخد في عزاكي ..

ميت .. متسند على عيان  ..

مستني حد ياخد يده ..

مع إن الحل أهو في يده ..

لكن خايف يرفع يده ..

لايهده .. صوت السجان  ..

حتى النسر مابين الاسود والاحمر ..

مستغرب ليه مربوطة جناحاته ..

وعايز يهرب لعلم تاني ..

من غير الوان …

****--------******-------*****

عنوان القصيدة( ان اطلقنا عليها ذلك)  مقتبس من مقطع من مسرحية “ سك على بناتك “ لفؤاد المهندس

//المهم أن الأستاذ المسن الذي تصلبت شرايين مخه، والذي عاش عصور النفاق منذ أيام مولانا ولي النعم، اعتلى المنبر فقال بالحرف الواحد: "الله يقول: إن في خلق السموات والأرض واختلاف الليل والنهار لآيات لأولي الألباب .. أما نحن فنقول: إن في خلق السادات والأرض .. كذا .."

//ماشئت لا ماشاءت الاقدار....فاحكم فأنت الواحد القهار
وكأنما أنت النبي محمد .....وكأنما أنصارك الانصار !!
بصرف النظر عما في هذا الكلام – البيت الأول - من شرك صريح، فإن أية أمة يُقال فيها كلام كهذا هي أمة مقضي عليها بالفناء.

//إقدام عمرو في سماحة حاتم .....في حلم أحنف في ذكاء اياس
هنا يتدخل رجل بلغت به (سلطنة) النفاق درجة أعلى .. هذا الرجل هو أبو يوسف يعقوب الكندي قائلاً: ـ"الأمير فوق من ذكرت !"

//أحيانًا يبلغ النفاق درجات من التعقيد يصعب أن تتخيلها .. مثل ذلك المطرب الذي ينشد في أحد أعياد أكتوبر: "لا حيغنيني ولا يرقيني .. ولا فيه مصلحة بينه وبيني .. باقولها وأجري على الله .. علشان كده احنا اخترناه !" .. يريد أن يقنعني أن مدحه لرئيس الجمهورية هو كلمة حق أمام سلطان جائر ! .. وأجره بعد ذلك على الله ..

//من مقال الدكتور أحمد خالد توفيق "الأمير فوق من ذكرت "