الفرح ... والحزن

صدقني ياصاحبي ..

الحزن له ناسه .. والفرح له ناسه ..

وناس تانيه ياصاحبي

بين ده وده احتاسوا ..

في ناس دايماً يا صاحبي الحزن موالهم ..

تنام هموم الناس وهمه تصحالهم ..

نفسهم لو يوم في مره .. يخرجوا للفرح بره ..

لكن للفرح باب .. الحزن ترباسه ..

وناس تانيه ياصاحبي .. عايشين عشان الفرح ..

لو حتى الحزن عدى يستقبلوه بالفرح ..

وكل واحد فيهم لو بص يوم حواليه ..

هيلقى دنيا صاحبه .. متفصله مقاسه ..

وناس تانيه ياصاحبي .. مابين فرحه وحزن ..

تحزن تنادي الفرحه .. تفرح تنادي الحزن ..

الفرح لو كان ثواني يقولوا ده كان سنه ..

والحزن لو كان سنه .. ينسوا ويتناسوا ..

ضحكتي

من زمان وضحكتي .. صوتها حيٌاني..
واتبسم .. شفتي.. تسلم على وداني..
قالواالبشر مجنون.. حد استلف عقلة..
ماهو اللي خلٌص البكا ..هبعمل ايه تاني؟

مش فاضل كتير

م الوقت مش فاضل كتير

وهنفترق في دروب كتير ..

ونفترق .. وذكرياتنا ..

تحرق دموعنا وتتحرق ..

خايف أقول كلمة وداع ..

خايف أحس بالضياع ..

خايف ألقى نفسي وحيد ..

من غير صديقه أو صديق ..

وباحاول أخلق وقت لكن ..

الوقت مني بيتسرق ..

خايف يتوهوا مني الصحاب ..

خايف مالاقيش كلمة عتاب ..

خايف تفوت بيا السنين ..

ما يفضلش منهم ..

غير صوره أو ورقة جواب ..

أشوفهم وأبكي ..

عاللي سافر واللي غاب ..

وعلى اللي جنبي ..

لكن بيني وبينهم ألف باب ..

خايف لاييجي علينا يوم ..

نشاور لبعض من بعيد ..

ونلاقي كل كام سنه ..

كلمه في مناسبه أو في عيد ..

ولما تجمعنا الصدف ..

هي ابتسامه ..

ومشاعر جامده من حديد ..

وكإنه مفاتش علينا يوم ..

كانت كل ايد حاضنه ايد ..

وكل يوم مهما كان ..

مادام سوا بيبقى عيد ..

طمنوني ..

قولولي ده مش راح يصير ..

ومهما طال بينا الزمن ..

مش راح نواجه ده المصير ..

قولوا أي حاجه ماتقولوش ..

م الوقت مش فاضل كتير ..

 Ahmed A. Mostafa 1994

بزياده

ضياع الحق بقى عادة ..

وم المعتاد ..

مادام نحيا ..

عشان الزاده .. و الزواد ..

ومن ناحية ..

نحب الخوف ..

ومن ناحية ..

بيعمى الشوف ..

ونركب طوف .. لاله لا عتاد ..

ولا جادة ..

ما بزيادة ..

قالوا

قالوا عليك العيب..
والعيب عليك.. ماعبرش..
رسموا في عينيك الشيب..
ونور عينيك..  ماكبرش..
مستني تلقى حبيب..
بس اللقا .. ما أمرش..

قالوا الكبير صغران.. 

بيحب قال تاني.. 

اسره هوى سعران.. 

جواته براني.. 

شرى من اهاته حروف.. 

وخيط عصي عالشوف.. 

ستر هواه بكلام.. 

خلى القمر ماظهرش.. 

قالوا عليك مجنون.. 

والنون بدالها راء.. 

ورا لحن مملي شجون.. 

والشين نقطها هباء.. 

جواها ضحكك بان.. 

وان فتحوا ليك بيبان.. 

مربوط ماتتحررش.. 

قالوا البعيد حاوي..
شق السما طبقين..
طبق نجوم  بالعسل..
والتاني فيه قمرين..
عزم البلد كلها.. شرقي.. وجري عالغرب..
ويا الحبيب انتهى..
غيره في هواه.. ماخطرش..