السماح

انا اسف..
مش هاقدر اسامح..
ولا هاقدر امسح امبارح..
انا بكره الميت قدامي..
وصاني لا انسى ولا اصالح..
صوتي الي طردتيه من ودنك..
ولساني اللي حرمتيه من اسمك..
وايديا وعيني وانفاسي..
وعقلي اللي ركنته في حوش راسي..
غاصبني اكون قاسي..  وجارح..
انا اسف..  مش هاقدر اسامح

انا اسف.. مش هاقدر انسى.. 

ولا ضحكه..  ولا دمعه ولمسه.. 

العمر ماهوش زرع وطارح.. 

دي سنين وسنين بنا واتهدم.. 

وضلعي..  في حياتي بيتيتم.. 

البعد ماهوش بعد مطارح.. 

انا اسف مش هاقدر اسامح.. 

انا اسف..  مش هاقدر أخلي.. 

ضلالك  يمسح م الخطى ضلي.. 

ولا صمتي يدوب في كلام مالح.. 

 عفوا..  يامستعجله أجلي.. 

انتي مادستيش سهوا.. رجلي.. 

علشان أصبح ناسي وصافح.. 

انا اسف مش هاقدر اسامح.. 

الطريق

صبح الطريق طريقين ..
والهم بقى ميه ..
من بعد كتر الجفا ..
معادش في نيه ..
لاشمال يخش يمين ..
ولا سكه محنيه ..
الكبر لما يسود ..
يضحى الجنون ..  غيه ..

ابانا الذي ..

ابانا الذي كب شوب اللبن ..
علينا وقال .. لماذا البكاء ..
كفايه عشان اصل صحن الوطن ..
ماهوش حمل طن الهبل والغباء ..

طب ايه ؟!!

ماعادش كلام خلاص يتقال ..

ولا للصبر أي مجال ..

و إيه  فايدة فنار العقل ..

مادام مطفي ..

عملت الصعب قبل السهل ..

ولا بتصفي ..

و بتجاهدي عشان تخفي  ..

حاجات واضحه ..

مشاكلنا.. قديمه   موت ..

ماهيش صابحة  ..

ماتستريهاش  ورا الطرحة 

و ماتجاوبيش ..

سؤال  ب  سؤال ..

لو السكه اخرها سد ..

ليه نمشيها ؟

ده مهما الحيل معانا اتشد ..

هنطويها ..

فيا نقصر .. وننهيها .

يجوز تتغير الاحوال ..

يا اما قوليلي  كيف تنحل ..وايه يتقال..

من دم لدم

من دم لدم
ولا حد إرتاح ..
ولا حد إهتم ..

الكل بيسمع للضالين ..
و الفاتحة ورا الموت في الميادين ..
و الناس حالفة متقولش أمين
غير لما تشوف الميت مين ..
مش يمكن صاد .. من دوكهمه
أو يمكن سين .. ويا التانيين ؟!!

من دم لدم ..
من مات إرتاح ..
و ياعايش .. ما كفاية اتلم ..

نص الكبايه

خلاص... 

نص الكبايه المليان.. 

اتعكر.. 

واتملا احزان.. 

مابقاش ينفع فلتر ضحكه.. 

ولا نظره هتصفي السكه.. 

وعتاب التقطير عطلان..

الكلمه مبقتش بتطلع..

وان طلعت طب ايه الفايده..

بتعدي على الودن وترجع.. 

زي اسطمبه في كارت معايده.. 

لا معنى بيغني ولا يشبع.. 

ولا احساس يروي العطشان..

حتى الاحلام 

لو غمضنا وقلنا نجرب .. 

نتعاتب.. 

ونحاول على بعض نقرب.. 

100 حيطه و 100 سور متكهرب.. 

بتغير فينا العنوان..

واهه ايام.. 

بتعدي علينا ونتصبر.. 

بكام ثانيه.. 

نتصافى فيهم ونقرر.. 

نبدأ تاني..  بس بنكبر.. 

وبنتكبر.. 

وبنحسب مين الغلطان..

ازاي صبح النص الفاضي.. 

اريح م النص المليان¿¡

إزاي

إزاي .. 

كل مره تبصيلي فيها .. 

أحس إنك .. 

أول مره تشوفيني فيها ..

 أول مره تحبيني فيها .. 

إزاي باحس كل مره ..

 إنك فيا بتبحري ..

 وتدوري .. 

على مرسى جديده ترسي فيها ..

 إزاي .. 

باحس من عينيكي انها ..

 أول مره تقابل عيوني ..

 أول مره بيشوفوني .. ويقفشوني .. 

بأقول لعينيكي باحبها .. 

إزاي .. 

إيديكي .. بلمسه واحده منها .. 

باحس فيها.. إني عمري مالمستها .. 

وتبقي تايهه بين مسامي ..

 وأقول حبيبتي عليا سمي .. 

يا أحلى توهه تهتها ..

 إزاي .. 

باحس .. كل مره بتحضنيني ..

 إني جنين .. 

وإنك انتي .. أول حضن ضمني ..

 وان اسمك .. أول حاجه نطقتها ..

إزاي خليتي خمس حواس ..

 يحسوا انك المماس ..

 بيني وبين .. كل حاجه بحبها .. 

 إزاي .. 
بتحسسيني كل يوم .. 

إني بكر .. 

وإن عمري مالوهشي ذكر .. 

قبل الورود اللي ف عيونك ..

 مايفتحوا ..

 ويخلوا عينيا يفتحوا .. 

على دنيا عمري ماشفتها ..

 إزاي .. 
بتحسسيني كل يوم ..

 إن القمر والنجوم ..

 والمطر .. والعواصف والغيوم ..

 والشمس اللي عليها بأقوم .. 

همه إنتي .. 

وإن إنتي وبس إنتي .. 

كل حاجه محتاجلها .. 

إزاي ..

 في فتره هينه .. 

وبنظره واحده حنينه .. 

أممتي عواطفي كلها ..

 إزاي .. 

بتكوني جديده كل يوم ..

 وتحبيني كل يوم .. 

بطريقه عمري ماشفتها .. 

احمد عبدالسلام