الدلع

طول عمري بافهم في الدلع..
والاصطناع..
مانا ليا باع..
مع كل من ضرب الودع..
وكل من ساق اللوع..
وكل من ناح اااااااه ياوجع..
في شكة صباع..
والطبطبه.. على ناس كتير بتكون غبا..
لو سبت نفسك في الوبا.. لابس قناع..
اصرخ ياعم.. ألمك اهم..
من ألف حد ماحس بيك..
ولاشافش فيك..
غير كوبري.. او فردة شراع..
كسبت ايه؟!
لما حياتك كلها.. 
شفتها..  وماشفتهاش..
عشتها..  وماعشتهاش..
وكل حاجه عشقتها..  ماخدتهاش..
و لما خدت ...  خدتها بلوي الدراع..
( دراعك انت)..
سيبك انت..
مش كل من قالك بحبك..
حبك انت..
في اللي حب حاجات معاك..
وفي اللي حب يعدي بيك..  مش معاك..
واللي عدى..  سابك وهدى..
وقالك ياعم بلاش صداع ..
فبلاش دلع..
خليك معاك..
"

الى اللي عارفين نفسهم

الى اللي عارفين نفسهم..
وباحس نفسي في حسهم..
اعزائي :
مانيش لاقي..
ذكرى حلوه من غيركم..
ولا بغيركم..
انا باقي..
كبرنا و صغرت أوقاتنا..
وبعدت كل مسافاتنا..
كتير عدى..
كتير فاتنا..
ياخطوه امتى تتشاقي..
وتتلاقي..؟!
انا عارف.. لا مش عارف..
حنيني ليه صبح جارف..
وحشتوني..
ومش لاقي.. 
غير اوراقي..
اكلمها..  احبائي..

احبك

احبك حتى استعانت حروفي.. 

باسمك حتى يكون الكلام.. 

وهمست يداي بلمسك شعرا.. 

يحاكي ملوك الهوى والغرام.. 

وطيفك صال بعقلي حروبا.. 

ويأبى فؤادي دعاة السلام.. 

نظرت اليك فحارت عيوني.. 

اإغماض جفنيَّ عنك حرام؟!

مابين .. وبين ..

مابين شاويش .. وبين درويش ..
صبحنا مافيش ..
وكله يموت ..
عشان مايعيش ..
واحد منهم ..
والتاني ..
يلف الدايره من تاني ..
يا اما بخطبه في الجامع ..
يا اما بحرب عالتاني ..
والحرافيش ..
مابين الجاني والجاني ..
بيجروا وينسوا في ثواني ..
حريه .. عداله ..وعيش ..
هنا الظالم .. تلاته ولا بس اتنين ؟
اقولك ؟!! .. ولا مافيش ..
وتوته توته .. حمضت الحدوته ..
وخلينا في طاحونه العيش ..

احمد عبد السلام مصطفى ..