اليتيم

كان مولود يتيم الحزب..
ولا ليه لا ام ولا جماعه..
وعاش امله يفوت م الغلب..
ولا يشوف ظلم..  ولا مجاعه..
لكن ماعرفش..
ورغم الرغم عاش صابر..
وحاول يمشي جوه الحيط..
ودعا لظالمه "تنه عامر"..
فسرقوا منه حتى الحيط..
وهدوا العش..
ولما قام عمل ثوره.. 
خدوها اخوانه بالغلبه..
وخفي العسكر وخد دوره..
ورجع داسهم كما العتبه..
ماهي الثوره في ايد اليتيم عجبه..
لكن معلش.. 
مسيرها تقوم.. وتمحيهم..
مسيرها تقش..

كيس بلاستيك

كيس بلاستيك ..

 مقطوعه ايده .. 

ملفوف بأستك ..

 مخبي فيه كل اللي حيلته ..

 فوطه صفرا .. 

ونص صوره للواد وعيلته ..

 وكتاب قديم ..

 والقطر فايت .. 

كل مرة .. مابيلحقوش 

وهم بايت .. مابيسيبوش .. 

تمسح يابيه ؟ ابعد ياواد بتهبب ابيه !!! 

تمسح يابيه؟ 

ياخدله شتمه ولعنتين .. من ورا ازاز الفيميه .. 

تمسح يابيه؟ امسح ياواد .. يديه جنيه ..

 يفرح يطير ..

 يفتح الكيس البلاستيك ..

 ويحطه فيه ..

 ويستخبى ..

 خايف عليه 

ويقول يارب ..

 خيرك كتير ..

 اكرمنا بيه.. 

احمد عبدالسلام-23/1/2008

اول

اكدبي تاني وتالت
مانتي كنتي ساقطه اول..
والعبي دور الشهيده..
الحكايه مش هاتطول..

الحكايه منتهاها..
فكره واخداكي لمصيرك..
كبريائك مبتداها..
والنهايه حد غيرك..
حد يرضى.. حد يفضل..

قسمه اتنين عالتلاته..
راح تطول العمر كله..
مابتقفش الا ما واحد..
يحب غيره ويتنازله..
ده الخناق على خرج قسمه..
طرح أخر.. شطب اول..

اقطعي وريد الرجوع..
وانسي انك كنتي ليا..
مهما كانت الدموع..
عمرها ما رجعت عنيا..
كنتي دمعه جت وراحت..
بس خدتي.. 
جوه عيني وقت اطول..

كنت دايما

كنتي دايما ..
بيني وبين الكلام ..
وبيني وبين الصمت .. السكه مفتوحه..
كل المعاني تدوب
في همسه بتقول سلام..
وتنهيده مجروحه ..
جمع الالم ..عاصي ..
وهوايه الساكتين ..
والكلمه لو بلسم ..
تفتكري تجرح اقل ..
محطوطه عالسكاكين ..؟

انا غلطان ..

انا غلطان ..

والانسان .. على حس اخوه عايش..
ولسه بيكره الطغيان ..
والعنوان ..
بتاع الامل معروف ..
ماهوش كرباج في ايد سجان ..
وانا غلطان ..
والالحان ..ماهيش مسروقه ولا حاجه..
ولا بتمدح جزم سلطان ..
والعالي .. لاهو نصاب ولا قاتل
والواطي .. مكانش عزيز وذله زمان..

وطير الرخ متواجد ..
والعنقاء .. بترفرف على البستان ..
وانا غلطان ..

السماح

انا اسف..
مش هاقدر اسامح..
ولا هاقدر امسح امبارح..
انا بكره الميت قدامي..
وصاني لا انسى ولا اصالح..
صوتي الي طردتيه من ودنك..
ولساني اللي حرمتيه من اسمك..
وايديا وعيني وانفاسي..
وعقلي اللي ركنته في حوش راسي..
غاصبني اكون قاسي..  وجارح..
انا اسف..  مش هاقدر اسامح

انا اسف.. مش هاقدر انسى.. 

ولا ضحكه..  ولا دمعه ولمسه.. 

العمر ماهوش زرع وطارح.. 

دي سنين وسنين بنا واتهدم.. 

وضلعي..  في حياتي بيتيتم.. 

البعد ماهوش بعد مطارح.. 

انا اسف مش هاقدر اسامح.. 

انا اسف..  مش هاقدر أخلي.. 

ضلالك  يمسح م الخطى ضلي.. 

ولا صمتي يدوب في كلام مالح.. 

 عفوا..  يامستعجله أجلي.. 

انتي مادستيش سهوا.. رجلي.. 

علشان أصبح ناسي وصافح.. 

انا اسف مش هاقدر اسامح.. 

الطريق

صبح الطريق طريقين ..
والهم بقى ميه ..
من بعد كتر الجفا ..
معادش في نيه ..
لاشمال يخش يمين ..
ولا سكه محنيه ..
الكبر لما يسود ..
يضحى الجنون ..  غيه ..

ابانا الذي ..

ابانا الذي كب شوب اللبن ..
علينا وقال .. لماذا البكاء ..
كفايه عشان اصل صحن الوطن ..
ماهوش حمل طن الهبل والغباء ..

طب ايه ؟!!

ماعادش كلام خلاص يتقال ..

ولا للصبر أي مجال ..

و إيه  فايدة فنار العقل ..

مادام مطفي ..

عملت الصعب قبل السهل ..

ولا بتصفي ..

و بتجاهدي عشان تخفي  ..

حاجات واضحه ..

مشاكلنا.. قديمه   موت ..

ماهيش صابحة  ..

ماتستريهاش  ورا الطرحة 

و ماتجاوبيش ..

سؤال  ب  سؤال ..

لو السكه اخرها سد ..

ليه نمشيها ؟

ده مهما الحيل معانا اتشد ..

هنطويها ..

فيا نقصر .. وننهيها .

يجوز تتغير الاحوال ..

يا اما قوليلي  كيف تنحل ..وايه يتقال..

من دم لدم

من دم لدم
ولا حد إرتاح ..
ولا حد إهتم ..

الكل بيسمع للضالين ..
و الفاتحة ورا الموت في الميادين ..
و الناس حالفة متقولش أمين
غير لما تشوف الميت مين ..
مش يمكن صاد .. من دوكهمه
أو يمكن سين .. ويا التانيين ؟!!

من دم لدم ..
من مات إرتاح ..
و ياعايش .. ما كفاية اتلم ..

نص الكبايه

خلاص... 

نص الكبايه المليان.. 

اتعكر.. 

واتملا احزان.. 

مابقاش ينفع فلتر ضحكه.. 

ولا نظره هتصفي السكه.. 

وعتاب التقطير عطلان..

الكلمه مبقتش بتطلع..

وان طلعت طب ايه الفايده..

بتعدي على الودن وترجع.. 

زي اسطمبه في كارت معايده.. 

لا معنى بيغني ولا يشبع.. 

ولا احساس يروي العطشان..

حتى الاحلام 

لو غمضنا وقلنا نجرب .. 

نتعاتب.. 

ونحاول على بعض نقرب.. 

100 حيطه و 100 سور متكهرب.. 

بتغير فينا العنوان..

واهه ايام.. 

بتعدي علينا ونتصبر.. 

بكام ثانيه.. 

نتصافى فيهم ونقرر.. 

نبدأ تاني..  بس بنكبر.. 

وبنتكبر.. 

وبنحسب مين الغلطان..

ازاي صبح النص الفاضي.. 

اريح م النص المليان¿¡