إزاي

إزاي .. 

كل مره تبصيلي فيها .. 

أحس إنك .. 

أول مره تشوفيني فيها ..

 أول مره تحبيني فيها .. 

إزاي باحس كل مره ..

 إنك فيا بتبحري ..

 وتدوري .. 

على مرسى جديده ترسي فيها ..

 إزاي .. 

باحس من عينيكي انها ..

 أول مره تقابل عيوني ..

 أول مره بيشوفوني .. ويقفشوني .. 

بأقول لعينيكي باحبها .. 

إزاي .. 

إيديكي .. بلمسه واحده منها .. 

باحس فيها.. إني عمري مالمستها .. 

وتبقي تايهه بين مسامي ..

 وأقول حبيبتي عليا سمي .. 

يا أحلى توهه تهتها ..

 إزاي .. 

باحس .. كل مره بتحضنيني ..

 إني جنين .. 

وإنك انتي .. أول حضن ضمني ..

 وان اسمك .. أول حاجه نطقتها ..

إزاي خليتي خمس حواس ..

 يحسوا انك المماس ..

 بيني وبين .. كل حاجه بحبها .. 

 إزاي .. 
بتحسسيني كل يوم .. 

إني بكر .. 

وإن عمري مالوهشي ذكر .. 

قبل الورود اللي ف عيونك ..

 مايفتحوا ..

 ويخلوا عينيا يفتحوا .. 

على دنيا عمري ماشفتها ..

 إزاي .. 
بتحسسيني كل يوم ..

 إن القمر والنجوم ..

 والمطر .. والعواصف والغيوم ..

 والشمس اللي عليها بأقوم .. 

همه إنتي .. 

وإن إنتي وبس إنتي .. 

كل حاجه محتاجلها .. 

إزاي ..

 في فتره هينه .. 

وبنظره واحده حنينه .. 

أممتي عواطفي كلها ..

 إزاي .. 

بتكوني جديده كل يوم ..

 وتحبيني كل يوم .. 

بطريقه عمري ماشفتها .. 

احمد عبدالسلام

عادت إليه

عادت إليه ..  
لم تتكلم. فقط نظرت إليه .. 
لاذت بصمت ..
 لم تعطه الفرصة ليمزق كلماتها .. 
ويبعثرها بطلقات فيه .. 
فقط نظرت إليه .. 
صرخ أن تكلمي .. 
وما ردت عليه ..
 صرخ أن انطقي .. 
وما رمت حرفا ..
 فقط نظرت إليه .. 
ردت بعينيها على شفتيه ..
 ردت على كل السنين الضائعات ..
ولسانها يتعبد .. 
في محراب عينيه ..
 ردت على كل همسة حب ..
 ماتت لديه .. 
ردت على كل أشواق السنين ..
 ردت على كل أمواج الحنين ..
 ردت عليه بدمعة .. 
مزقت خديه .. 
لاذت بصمت مطبق .. 
نظرت إليه ..
 ما عادت له ..
 لكنها ..
 عادت إليه .. 

احمدعبدالسلام

2000

كلام هتقولهولي

قالت عايزه تشوفني .. 

 وكلام كتير هتقولهولي ..

 ماصدقتش نفسي ..

 وكنت خلاص هاقع من طولي

 معقولة تكون حست بيا .. 

واللي ماقولتوش هتقولهولي ..

 حسيت الدنيا بتضحكلي ..

 والفجر جاي بيشقشقلي ..

 والعصافير طايره تزقزقلي ..

 وغناوي الحب اتغنولي ..

 ورسمت قلوب ..

 م الهوى بتدوب .. 

ومرايتي تقوللي حالك مقلوب ..
و إيه يعني ..

 ما حبيبتي هتيجي تعدلهولي .. 

 وقعدت أرتب في كلامي ..

 وازاي هاحكيلها على غرامي ..

 وكتبت ورق يمكن طولي .. 

وقبل معادنا بييجي ساعتين .. 

لقيت الثانيه بتستنى يومين ..

 وكل دقيقه كأنها سنتين ..

 والعقرب بيقول عدولي ..

 ووصلت روحي ..

 قلبي وعقلي ودمي وروحي .. 

وجسور الحب اتمدولي ..

 وسلمنا .. واتكلمنا .. 

كلام كتير بعيد وقريب .. 

وقالت طبعاً إنت عارفني .. 

وعارف ان انت لروحي قريب .. 

وانا عارفه انك أصدق صاحب.. 

وهتفهمني بسرعه يا طيب .. 

 قلتلها ياستي أنا هافهم .. بس عليكي إنتي تقولي .. 

 وقالتلي ..

 بصراحه أنا حبيت صاحبك ..

 عايزاك تبقى تكلمهولي ... 

احمد عبدالسلام- مارس 95

ابن آدم

نادم تنادم لا تندم يابن آدم 
ما في غير نديمك يديمك يابن آدم 
حب ابن آدم تدوم دنيا ابن آدم
 و دامت ما دامت زايل يابن آدم 

ياللى بنيت الكون بإيديك
 عليت و صار السحاب حواليك 
و لما بصيت فى مراية عينيك
 طلعت ناسى تبنى ابن آدم يابن آدم 

 من طين حضرت و لطين تعود
 و لا يوم رضيت باللي كان موجود
 طمعت و فاكرها دايمة لك عهود 
و لقيتها زايله و رجعت نادم .. يابن آدم 


‎‎‎‎‎سنيت سكاكين سكونك بإيدك
وجرحت اخوك وابوك وحتي وليدك
ماشي ماتعرف عدوك من حبيبك
ماعدو ابن آدم الا انت يابن آدم

 دنى ودناوة الدنيا فيك واية يشفيك
 دانت قطوف الدنيا ليك ولامكفيك
 مايملا عينك الاالتراب ولايخليك
 ترضى بقليلك غير ايمانك برزق هاديك ..يابن آدم 

 غرور وكبر ملوك بغطرسة الملوك 
خلوك في لحظة تنسى امرك لمين مملوك 
عملك معاك ومال وجاة متروك 
هوة الى ينفع قدام ملك الملوك ..يابن آدم

 لبست ثوب التوبة وقلت يارب السماح 
يفتحها ربك عليك ربك غفور فتاح 
ترجع تعيد النوبة وفاكر عمرك براح 
لا العمر تقدر تعيدة ولا انت راح ترتاح ..يابن آدم

 لية زرعت بدل السنابل قنابل 
وغطى صوت حروبك على صوت البلابل
 وضاعت حياتك مابين حابل ونابل 
ونسيت يوم ربك فيه تقابل ..يابن آدم

 آة يابن آدم وآة وآة يامسكين 
باللى ابيت على نفسك تستكين 
تغلط وفاكر هتنسيك السنين 
ونسيت ان اللى يزرع شوك بيحصدة سكاكين ..يابن آدم 

 اجرى يابن آدم و ان تجرى جرى الوحوش
 تسبق مهما تسبق غير رزقك لن تحوش
 قالوا زمان اسعى و ربك يحوش 
هو اللى يرزق عصفوره بين الوحوش .. يابن آدم 

 ما انت ملاك لكن جواك ضمير الكون 
بإيدك حياته بإيدك مماته بإيدك يكون 
نهار و نوره نيران حريق طمع بيهون 
و برحمته تلاقى جنه آخرته لك تكون .. يابن آدم

 ما الدنيا الا طريق و انت عابر سبيل 
يا تميل معاك يا انت معاها تميل 
مالت معاك تضوى لك القناديل 
هتميل معاها هتموت مع القناديل .. يابن آدم 

. آه يابن آدم .. سكت السكات منك خلص الكلام عنك .. يابن آدم 

احمد عبدالسلام
يوليو 92

يحكى أن

يحكى أن..
 و كان ياماكان ..
 كان في ليله حلوه جميله ..
 والناس عامله فيها هليله ..
 قامت غاره ..
 قلبت ضلمه كل الحاره ..
 وهب لقينا أعلى عماره .. 
طبت وقعت .. 
سدت كل منافذ الحاره ..
 وناس تتشاكى ..
 وناس تتباكى ..
 وناس تتحاكى ..
 وناس محتاره ..
 ثم لقينا ..
 راديو بيرغي من حوالينا .. 
وبسرعه قمنا اتلمينا ..
 لقينا المارش ..
 ما اتاخرش .. 
وابو بيانات مستني المارش ..
 ووسط اللمه ..
 لقيناه بيحلف باسم الأمه ..
 إنا نسفنا مية طياره .. 
وكام دبابه وكام سياره .. 
ولافيش عندنا أدنى خساره ..
 ثم سكت ..
 وعيوننا بكت ..
 ثم ضحكنا لما تعبنا ..
 وقلنا ياريت تدينا أماره ..
  و كان ياماكان ..

أحمدعبدالسلام

الجرانين

في الجرانين .... 
تقرا يوماتي خبر متين ... 
عن الحرامي اللي سرق ساعة بميتين ... 
 وظابط كبير لم العساكر عشان شوية شحاتين ..
 وسبع البرمبة اللي ضربله بمبة ..
 بين اتنين موظفين ...
 ووليه .. واكله ليه ...
 وحاطه راس جوزها في كيسين ..
 وطابور غجر ... ونسوان عجر .. 
في القضايا ممسوكين ...
 ويهودي .. ينهب حدودي ..
 والكبار مستهبلين ... 
 وصالات قمار .. في الدرى .. وفي الجهار ..
 وأفلام يكسفوا منها الكبار ...
 والرقابة عميانين ...
 وكبير مناصب .. عالخلق ناصب ..
 باسم شوية قوانين .. 
 وفي المكاتب .. باشكاتب كاتب .. 
فتح معايا يابو العينين ..
 وفاتحلي درجة .. ومعللي برجة ..
 ياتمشي حالك يا تنام سنين ..
 وبيوت دعارة .. راخية الستارة ..
 متوثقة ...
 والغواني متوظفين .. 
 ومجلس موقر .. فية ناس تفكر .. 
يقول موافق .. 
بالشمال ولا اليمين .. 
 ونايب كيف ..
 يبيع عالرصيف ..
 اجعل كلامنا ربي خفيف ..
 عالحصانة .. قول آمين ..
 وإمام مساجد .. راكع وساجد .. 
وفي الخطب يكفرك ..ويدعي عليك وتقول أمين ..
 وسايبين بلاة .. مادام في النهايه يكون دعاة ..
 وفق أمير المؤمنين ..
 ومستشفيات زمانها فات ..
 والدكاترة عيانين ..
 ورئيس قطاع .. يؤمر يطاع ..
 وعضو في نادي القوادين .. 
 وجزار ... غاوي الهزار ...
 يوكلك لحم الحمير الميتين ...
 وفي المدارس ... ضربوا اللي دارس ..
 والعيال متسممين ..
 وحبة عيال .. لقيوا الجميلة سايقة الدلال .. 
راحوا واخدينها لمكان أمين .. 
 وإرهاب قايم .. بشوية بهايم .. والأمن نايم .. 
والكبار متنومين .. 
وبعد الجزارة .. يصحوا الكبار يجروا في زيارة .. 
على المواقع .. يمكن يصحوا الميتين ..
 وفلوس وياما .. هربوا بيها بالسلامة ..
 وبعدها قال .. م السفر دول ممنوعين ..
 ومقالات حكومة .. عايمالها عومه 
على عوم كبير الهجاصين
 وسفاحين .. ونصابين .. وكدابين .. ومرتشين .. 
كل ده قريناه وإحنا .. بالجرانين .. متغطيين ..

احمد عبدالسلام

لي أنا

عندما أحب ..
فالزمان .. لي أنا ..
 والشمس تشرق .. لي أنا ..
 وزقزقة العصافير .. لي أنا ..
 وضوء القمر .. لي أنا ..
 ونسمات الصباح .. لي أنا ..
 وحر الصيف .. وبرد الشتاء .. لي أنا ..
 والزهور تتفتح وتتلون .. لي أنا ..
والأمطار تهطل .. والمياه تجري .. لي أنا ..
 والصباح والمساء .. لي أنا ..
 وكل الأشعار والألحان .. لي أنا ..
 والرعد والبرق والعواصف .. لي أنا ..
 والأرض تدور .. لي أنا ..
 كل شئ .. لي أنا ..
إلا أنا ..
 فأنا لحبيبتي ..
 وحبيبتي ..
 لي أنا .. 

أحمدعبدالسلام..27/6/2008

إذا رأيتني

 .. ياصديقي 

إذا رأيتني يوماً ..

أئن كالناي ..

وقد ارتخى كتفاي ..

وحزني يجر أحزان البشر ..

فأرجوك .. لاتخبر أحداً ..

أن من حزني ..

ولدت أحزان البشر ..

وإذا رأيتني يوماً ..

قد كسرت مظلتي ..

وابتلت عبائتي ..

وقد جف ريقي .. برغم المطر ..

فأرجوك لاتخبر أحداً ..

أن من دمعي ..

كان المطر ..

فقط أخبرهم .. أني أحببتها .. 

وفقدتها ..

وبعدها ..

لم تر لي من أثر ..

أحمد عبدالسلام 

النعام

هي إيه أخر الإجابة

عن سؤال ماهوش سؤال 

ولا إيه أخر الكتابة

عن رجال ماهيش رجال

ولا إيه أخر المعاندة

ولا إيه أخر المجاهدة

لو عينيك ماكنتش شاهده

حط راسك في الرمال

يعني إيه ناسي و ناسك 

هو إيه أصل الخلاف 

ماللي داسني برضه داسك

وربي ربك لاخلاف

يبقى ليه تخرجني بره 

ولا ليه تكفرني مره 

لو عايزها بجد حرة 

نتفق عا الاختلاف

أحمد عبدالسلام مصطفى
٨ أبريل  ٢٠١٢

Quotes1

He always finds himself lost in Thoughts; It is unfamiliar territory




Support bacteria, they are the only culture some people have

Sometimes I need what only you can provide: YOUR ABSENCE

Everyone is entitled to be stupid, but some abuse the privilege...

إنحدار

تعرف ازاي انك بتواجه جهل وإنحدار إنساني وعلمي وعقلي  .. لما تلاقي المواقف دي 

لما تلعن ناس عشان لسانهم وسخ أو وحدة إتصورت صورة مش عاجباك و تمجد في ناس قتلو (أو مسئولين عن قتل ) الألاف .

و برضه لما تلاقي ناس مبتعرفش تقول رأيها غير لما تقول كلام وسخ 

لما قلبك يطاوعك انك تستغل وجود بعض البلطجية لتعمم أن كل الثوار بلطجية ، حتى أمهات قلبهم انفطر على ولادهم. 

و برضه لما تستغل أمهات قلبها مفطور على ولادها في لحظات هم أضعف مايكونو فيها .

لما تصر إن من حق الشرطة تقتل الناس بحجة الدفاع عن معاقل الداخلية .. طب هما لو ضربوهم في رجلهم هيهجمو برضه .. دة بفرض انهم لسه بيهجمو ..

و برضه لما تلاقي ناس بتشجع شباب في عمر الورد أن يموت بلا طائل 

لما تقعد تشتم في كاتب أو شخصية و تقول عليه خاين و عميل و لما يقول إلي على مزاجك تستشهد بكلامه و تنشره . 

أو لما تمجد في كاتب أو  شخصية و لما ميعملش إلي على مزاجك يبقى خاين و عميل .

لما تلاقي تأليه الشخصيات يوصل لأن الناس تفتكر إن المجلس العسكري هو الجيش و إن المجلس العسكري لو راح هتبقى البلد راحت .

و برضه لما تلاقي ناس فكرة إنه بمجرد رحيل المجلس العسكري الحياه لونها هيبقى بمبي.

لما تلاقي ناس عمرها ما اشتغلت بتقلك أنا نازل الشغل يوم الإضراب عشان البلد ما تقفش. 

 و لما تلاقي ناس بتدعو لإضراب عام بدون تنظيم بما يضرهم هما مش إلي عايزيين يوصللهم الإضراب .

لما تصدق إن أي شخص هيكون صالح و محصلش مدام بقول قال الله وقال الرسول (حتى لو طلع الكلام ملوش علاقة بما قاله الله أو الرسول  )

و لما ترفض تصدق أي حد لمجرد إنه بيتكلم بإسم الدين .

حكم عقلك  مفيش حد صح على طول .. و مفيش حد غلط على طول ، و مش معنى إن حد مش ماشي في سكتك يبقى خاين و عميل و مش معنى إن حد ماشي معك إنه عايز مصلحتك ، و مش معنى إنه غير من هنا لهنا إنه إرتد عن دينك 

أحمد عبدالسلام مصطفى 

11.02.2012

شرب القهوة

شرب القهوة  ..

كانت مرة  ..

أصله محطش فيها السكر ..

مع إن السكر قدامه  ..

لكن مش عارفه .. أصل الامه ..

خلته ينسى حتى كلامه  ..

بس شربها ..

ماهو ياما  حلول إستقربها ..

علشان أريح ..

مش ناوي يتعب ويفكر  ..

فات قدامه ..

واحد المفروض خدامه  ..

بس كلامه ..

و كانه  سيد أيامه ..

حطله معلقتين في القهوة ..

قاله دة سكر ..

صبحت مرة يمكن أكتر ..

وفضل يشربها ..

مهما المر دماغه حاربها ..

كان متعود ..

راضي بالمر كانه مقدر ..

فات قدامه  ..

واحد كان النور في سلامه ..

حلو كلامه ..

بس  غريب ..

بيقول نتحرك و نفكر ..

حطله معلقتين في القهوة 

قاله دة سكر ..

صبحت أحلى ..

و استغربها ..

و قعد متردد يشربها ..

لعن الواد و لعن أيامه ..

ماهو معرفشي طعم السكر ..

لما تفكر ..

شيل الملح ..حط السكر ..

يسقط ..يسقط ..حكم العسكر ..

أحمد عبدالسلام مصطفى 

31.01.2012