الترتيبات

انت الأخير في الترتيبات

وانت الأخير في المحبوبين

لكن أكيد وقت الحاجات..

بتبقى أعلى المطلوبين..

حواليك كتير.. 

لكن لوحدك بالكتير.. 

وحتي نفسك مش معاك.. 

وحتى عمرك مش سنين.. 

مكتوب عليك انك تبات..

والحزن مالي عين وعين..

بتفتكرهم من سكات.. 

ينسوك وهما مغمضين 

منتاش وحيد.. لكن وحيد بتبان.. 

منتاش بعيد.. لكن بعيد تتعان.. 

مليان آهات.. مليان حنين.. 

مليان بناس مش موجودين.. 

كانت غلطتك ؟! 

ولا غلطة مين ؟! 

الصور

وباقي مني كام صوره..

وكام معنى وكام عنوان.. 

وكام غنوه ومحفوره.. 

في ودني.. 

وليها بيت ومكان.. 

وكام موقف معدوشي.. 

وكام كلمه هدوني ومهدوشي.. 

وكام انسان.. 

باقي مني كام صوره.. 

بيخرج منها يوماتي حاجات.. 

كانت الوان.. 

كانت بهجه وصوت ضحكات.. 

كانت احضان.. 

ونظره فيها كلام وسكات.. 

ودلوقتي.. بيخرج منها كتير اسوار

وفيها من الحنين اسرار.. 

لأطياف مبقتش موجوده.. 

خلاص مبقتش "وبعوده"

  باقي مني كام معنى..

كانت اكتر كتير يازمان.. 

وراح الوقت واستعنى.. 

يخلي ليا ذكرى كمان.. 

عيناي الساحرتان

منشوره بجريده الدستور

عيناي الساحرتان

مش شاعر

لا انا شاعر.. 

ولا عندي كلام موزون.. 

ولاقربت اكون فنان.. 

ولاباكتب كلام في الجون.. 

ولا عارف لنفسي مكان.. 

انا عايش.. انا انسان.. 

ساعات عاقل.. ساعات مجنون.. 

ساعات عامل.. حكيم الكون.. 

ودي تخاريف.. 

شخبطه على حيطه قلب نظيف.. 

يجعل كلامي يارب خفيف.. 

وله معنى.. 

وله مضمون.. 

مش عارف

معرفتش اقول ولا كلمه 

عنك وفراقك خد صوتي..

خد مني اقلامي وكراريسي.. 

والبسمه اللي مأجله موتي..

انا وانت اتنين كنا في واحد.. 

وواحد فيهم ساب نفسه وراح.. 

انا وانت براح.. 

اصبح ضيق.. 

روح بتزيق.. على بكره الجاي.. 

طب اعمل ايه.. 

والناس بتقوللي خلاص جرى إيه..

واللي مجربش هيعرف ايه.. 

جربت تصاحب شئ منك..

وتقوله انا عايزك ويايا.. 

ليه تبعد.. اخرك جوايا.. 

ومعايا اكمنك.. انا منك.. 

جربت تقابل أحلامك ..

مطرح ماتقابلك كوابيسك..

ومعاه تتعاهدوا.. وترابيسك .. 

تتفتح.. تضحك أيامك..

جربت تواعد يوم همك..

على ناصيه بسمه يادوب هتبان..

والدنيا عيان.. 

وسايبينك.. 

ومحدش غيره معاك ددبان.. 

لو جربت.. اكيد عارف

معنى ان انت بقيت مكشوف.. 

واللي مجربش.. 

اهه صعب يشوف.. 

الحدوته

انا كنت..

وبقيت.. 

ومابينهم.. 

رحت وجيت.. 

وكام يوم منهم حبيت.. 

وارتحت.. 

وشقيت.. 

وضحكت.. 

وبكيت.. 

وادي كل الحواديت.. 

كل عام

كل عام وانتم تمام.. 

كل عام وانتم بخير.. 

 كل عيد وانتوا في هدايه 

والصلاح ليكوا خط سير.. 

كل عام واحبابكوا بيكوا.. 

عايشين احلى كل ثانية.. 

كل عام وولاد عينيكوا 

مفرحينكوا دين ودنيا.. 

كل عام وبلادنا خارجه.. 

من تحت رجلين الكلاب.. 

والشيطان اللي مابينا.. 

مايلاقيش للفتنه باب.. 

كل عام وانتم احبه

كل عام وانتم بخير

2014